छत्रपती संभाजीनगर: जगभरातील सर्वोत्कृष्ट चित्रपट मराठवाड्यातील रसिकांपर्यंत पोहोचवणाऱ्या नवव्या अजिंठा वेरूळ आंतरराष्ट्रीय चित्रपट महोत्सवाची घोषणा करण्यात आली आहे. यंदाचा पद्मपाणी जीवन गौरव पुरस्कार ख्यातनाम गीतकार, लेखक जावेद अख्तर यांना जाहीर झाला आहे. दि ०३ ते०७ जानेवारी २०२४ या दरम्यान छत्रपती संभाजीनगर येथे होणाऱ्या महोत्सवात जावेद अख्तर यांना हा पुरस्कार प्रदान करण्यात येणार आहे.
महोत्सवाचे संस्थापक व संयोजन समितीचे अध्यक्ष नंदकिशोर कागलीवाल व प्रमुख मार्गदर्शक अंकुशराव कदम यांनी या पुरस्काराची शनिवारी घोषणा केली. भारतीय सिनेसृष्टीतील अतुलनीय योगदानाबद्दल जावेद अख्तर यांना पद्मपाणी जीवनगौरव पुरस्कार प्रदान करून गौरविण्यात येणार आहे. पुरस्कार निवड समितीने सर्वानुमते त्यांच्या नावाची निवड केली आहे. या समितीत प्रसिध्द चित्रपट दिग्दर्शक गिरीश कासारवल्ली, बेंगळुरू,ज्येष्ठ समीक्षक लतिका पाडगांवकर (मुंबई),प्रसिद्ध हिंदी कवी अशोक बाजपेयी (दिल्ली),फेस्टीव्हल डायरेक्टर अशोक राणे,प्रसिद्ध चित्रपट दिग्दर्शक चंद्रकांत कुलकर्णी यांचा समावेश होता. पुरस्काराचे स्वरूप पद्मपाणी सन्मानचिन्ह, सन्मानपत्र व दोन लक्ष रुपये असे आहे.पद्मपाणी जीवनगौरव पुरस्काराचे वितरण मान्यवरांच्या हस्ते महोत्सवाच्या उद्घाटन सोहळ्यात ३ जानेवारी रोजी सायंकाळी सात वाजता एमजीएम कॅम्पसमधील रुक्मिणी सभागृहात होणार आहे.
हिंदी चित्रपटसृष्टीतील लेखणीचे जादूगार समजले जाणारे जावेद अख्तर यांनी आपल्या गाणी, गझल, चित्रपट, संगीत आणि पटकथांद्वारे चित्रपट विश्वात एक वेगळे स्थान प्राप्त केले आहे. जावेद अख्तर आणि पटकथाकार सलीम खान यांच्यासह शोले, जंजीर, दीवार इत्यादी सर्वोत्कृष्ट बॉलीवूड चित्रपटांच्या पटकथा लिहिल्या आहेत. १९९९ मध्ये जावेद अख्तर यांना पद्मश्री हा भारताचा चौथा सर्वोच्च नागरी पुरस्कार देखील प्रदान करण्यात आला. याशिवाय त्यांनी एकूण पाच वेळा सर्वोत्कृष्ट गीतकाराचा राष्ट्रीय पुरस्कार आणि एकूण सात वेळा सर्वोत्कृष्ट गीतकाराचा फिल्मफेअर पुरस्कार जिंकला आहे. लोकशाही आणि प्रागतिक विचारसरणीला प्रोत्साहन देण्यासाठी त्यांना २०२० मध्ये रिचर्ड डॉकिन्स पुरस्काराने सन्मानित करण्यात आले. छत्रपती संभाजीनगरचे नाव चित्रपट क्षेत्रात जागतिक व्यासपीठावर नेणाऱ्या या महोत्सवात मराठवाड्यातील नागरीकांनी सहभाग नोंदवावा, असे आवाहन संयोजन समितीचे अध्यक्ष नंदकिशोर कागलीवाल, प्रमुख मार्गदर्शक अंकुशराव कदम,सचिन मुळे, सतीश कागलीवाल, महोत्सवाचे डायरेक्टर अशोक राणे, आर्टिस्टीक डायरेक्टर चंद्रकांत कुलकर्णी, महोत्सवाचे संयोजक नीलेश राऊत, क्रियेटिव्ह डायरेक्टर जयप्रद देसाई, ज्ञानेश झोटींग,शिव कदम,डॉ.श्रीरंग देशपांडे, प्रोझोनचे कमल सोनी,आकाश कागलीवाल, डॉ. अपर्णा कक्कड, डॉ. आशिष गाडेकर, डॉ.रेखा शेळके, प्रा. दासू वैद्य, डॉ. आनंद निकाळजे,प्रेरणा दळवी,डॉ.कैलास अंभुरे,नीना निकाळजे,निता पानसरे,सुबोध जाधव आदींनी केले आहे.