वैजापुर (औरंगाबाद ) : लाडगाव रोडवरील वैजापुर पोलीस ठाणे हद्दीतील नागीणपिपळगाव शिवारात भरधाव ट्रकने पाठीमागून दुचाकीला जोरदार धडक दिली. यात दुचाकीवरील सुंदरबाई मतसागर ( ६५, रा.जरूळ) यांचा जागीच मृत्यू झाला. तर मच्छिद्र वारकर ( रा. हिंगोणी ) हे गंभीर जखमी आहेत.
जरुळ येथील सुंदरबाई मतसागर या वृद्धा नातेवाईकांकडे जागरण गोंधळ कार्यक्रमासाठी रात्री आल्या होत्या. कार्यक्रम संपल्यानंतर त्यांनी नातेवाईकांकडे मुक्काम केला. आज सकाळी मच्छिंद्र वारकर या नातेवाईकासोबत दुचाकीवरून सुंदराबाई गावाकडे निघाल्या. दुपारी एक वाजेदरम्यान नागीणपिपळगाव शिवारात पाठीमागून आलेल्या भरधाव ट्रकने ( एमएच ४२ एफ ७७९७ ) दुचाकीला जोरदार धडक दिली. यात सुंदराबाई खाली कोसळून जागीच मृत पावल्या. तर मच्छिंद्र हा गंभीर जखमी झाला.
अपघाताची माहिती मिळताच वीरगाव पोलीस ठाण्याचे सहाय्यक पोलीस निरीक्षक विजय नरवडे कर्मचाऱ्यांसह घटनास्थळी पोहचले. पोलिसांनी तत्काळ जखमीस उपजिल्हा रुग्णालयात दाखल केले. दरम्यान, पोलिसांनी ट्रक चालकास ताब्यात घेतले आहे. पशुखाद्य घेऊन जाणारा हा ट्रक वैजापूरकडे जात होता. अपघातानंतर विस्कळीत झालेल्या वाहतून पोलिसांनी सुरळीत केली.