फुलंब्री : माजी आमदार बच्चू कडू यांच्या अन्नत्याग आंदोलनाच्या समर्थनात फुलंब्री तालुका प्रहार संघटनेच्या वतीने गुरुवारी दुपारी एक वाजता तहसीलदारांच्या दालनात अर्धनग्न आंदोलन करण्यात आले. साहेब, अंगावरचे कपडेही घ्या, पण शेतकऱ्यांचा सातबारा कोरा करा, अशा घोषणा यावेळी आंदोलकांनी दिल्या. तसेच तहसीलदार नसल्याने त्यांच्या खुर्चीवर साडी-चोळी ठेवून सरकारचा निषेध नोंदवला.
महायुतीने निवडणुकीपूर्वी शेतकऱ्यांना कर्जमाफीचे आश्वासन दिले होते. पण, ते पूर्ण केले नाही. शेतकऱ्यांच्या कर्जमाफीसाठी प्रहार संघटनेचे नेते आ. बच्चू कडू यांनी अमरावतीतील मोझरी येथे बेमुदत अन्नत्याग आंदोलन सुरू केले आहे. सरकार या आंदोलनाची दखल घेत नसल्याने त्यांच्या समर्थनात फुलंब्री येथील प्रहार संघटना आक्रमक झाली. स्थानिक पदाधिकारी, कार्यकर्त्यांनी तहसील कार्यालयात तहसीलदारांच्या दालनात आंदोलन केले. साहेब, आता अंगावरचे कपडेही घ्या, पण शेतकऱ्यांचा सातबारा कोरा करा, अशा घोषणा देत अक्षरश: कपडे काढून टेबलवर ठेवले. योवळी सरकारला साडी-चोळीची भेट देऊन निषेध व्यक्त केला.
तहसीलदार नसल्याने नायब तहसीलदार नरेंद्र उखळकर यांच्याकडे निवेदन देण्यात आले. सरकारने बच्चू कडू यांच्या आंदोलनाची दखल न घेतल्यास येणाऱ्या काळात छत्रपती संभाजीनगर-जळगाव महामार्गावर रास्ता रोको आंदोलनाचा इशारा प्रहार संघटनेच्या वतीने देण्यात आला आहे. या आंदोलनात प्रहार संघटनेचे तालुकाध्यक्ष सुदाम गायकवाड, कृष्णा गाडेकर, रावसाहेब खिल्लारे, राहुल काकडे, गणेश सुरभय्यै, भारत राऊतराय, आकाश मोरे, अमोल कोलते, जीवन गायकवाड, आदी कार्यकर्त्यांनी सहभाग नोंदवला.