औरंगाबाद : दुचाकीस्वाराचे भरधाव वाहनावरील नियंत्रण सुटल्याने तो दुभाजकावरील बीमला धडकला. यात तो गंभीर जखमी झाला. हा अपघात रविवारी दुपारी अडीच वाजेच्या सुमारास बीड बायपासवरील महानुभाव आश्रम चौकाजवळ घडला. शेख फैजान शेख हबीब (२२, रा.सादातनगर), असे गंभीर जखमी झालेल्या दुचाकीस्वाराचे नाव आहे.
शेख फैजान हा एका खाजगी कंपनीत विक्री प्रतिनिधी म्हणून काम करतो. पैठण रोडवरून रविवारी दुपारी त्याने महानुभाव आश्रम चौकात बायपासकडे वळण घेतले आणि दुचाकीवरील नियंत्रण सुटले. यावेळी तो दुचाकीसह दुभाजकावरील बीमला धडकून दुसऱ्या लेनवर जाऊन पडला. या अपघातानंतर प्रत्यक्षदर्शींनी मदत करीत रुग्णवाहिकेतून फैजानला घाटी रुग्णालयात दाखल केले. या अपघाताची नोंद सातारा ठाण्यात करण्यात आली. वाहतूक पोलिसांनी घटनास्थळी धाव घेऊन माहिती घेतली. प्रत्यक्षदर्शींनी सांगितले की, घटनास्थळाजवळ एका जणाची हुरडा पार्टी असल्याने रस्त्यावरच मोठ्या संख्येने चारचाकी वाहने उभी असतात. या वाहनांमुळे वाहतूककोंडी होते. वाहतूक पोलीस मात्र त्या वाहनांकडे दुर्लक्ष करीत असल्याचे त्यांनी सांगितले.