छत्रपती संभाजीनगर : महापालिकेने शहरातील प्रमुख ४ रस्ते २०० फूट रुंद केले. सर्व्हिस रोडसाठी महापालिकेकडे निधी नाही. केंद्रीय मंत्री नितीन गडकरी यांनी ७ जुलै रोजी दिल्लीत भेटीसाठी वेळ दिला आहे. यावेळी मनपा अधिकारी रुंद रस्त्यांचे सादरीकरण (प्रेझेंटेशन) करणार आहेत. एक हजार कोटी रुपयांच्या निधीची मागणी रस्त्यांसाठी करण्यात येणार आहे. या बैठकीला राष्ट्रीय महामार्ग प्राधिकरणाचे स्थानिक अधिकारीही उपस्थित राहणार आहेत.
शेंद्रा एमआयडीसी, बिडकीन डीएमआयसी भागात भविष्यात अनेक नवीन उद्योग येतील. त्याचप्रमाणे पर्यटनाची राजधानी असलेल्या छत्रपती संभाजीनगर शहरात दरवर्षी लाखोंच्या संख्येने पर्यटक येतात. शहरातील मुख्य चार रस्ते अत्यंत सुंदर आणि पुरेसे रूंद असावेत, अशी महापालिकेची भूमिका आहे. त्यादृष्टीने मागील महिनाभरात बीड बायपास, जालना रोड, पैठण रोड, पडेगाव-मिटमिटा रोड ३०० फूट रुंद करण्यात आले. या चारही रस्त्यांवर सर्व्हिस रोड करायचा म्हटले तर निधी खूप लागणार आहे. महापालिकेची आर्थिक परिस्थिती एवढी चांगली नाही. राष्ट्रीय महामार्ग प्राधिकरणाने थोडासा हातभार लावला तर रस्ते होतील.
मनपा प्रशासक जी. श्रीकांत यांनी पुढाकार घेत राष्ट्रीय महामार्ग प्राधिकरणाकडे निधी मिळवण्यासाठी प्रयत्न सुरू केले आहेत. या प्रयत्नांना यश मिळत असून, केंद्रीय मंत्री नितीन गडकरी यांनी ७ जुलै रोजी मनपा अधिकाऱ्यांच्या शिष्टमंडळाला भेटीसाठी बोलावले आहे. अतिरिक्त शहर अभियंता (विशेष प्रकल्प) ए. बी. देशमुख यांना दिल्ली येथील बैठकीत सादरीकरण (प्रेझेंटेशन) करण्याची सूचना प्रशासकांनी केली आहे. यावेळी मनपाकडून १ हजार कोटींची मागणी करण्यात येणार असल्याचे सूत्रांनी सांगितले.
५० किमीचे चार सर्व्हिस रोडरस्ता--------------------------अंतर किमी-------सर्व्हिस रोड किमीमुकुंदवाडी ते केम्ब्रिज--------६------------------१२महानुभव आश्रम ते देवळाई--७------------------१४महानुभव आश्रम ते गेवराई---५.९---------------१२पडेगाव ते दौलताबाद टी पॉईंट---६.३-------------१२