सोयगाव : प्लॅटफॉर्मवरून निघण्यापूर्वी बसमध्येच चालकाचा हृद्यविकाराने मृत्यू झाल्याची घटना गुरुवारी पहाटे सोयगाव आगारात घडली. नागोराव मेश्राम ( ४८) असे मयत चालकाचे नाव आहे. त्यांच्यावर यवतमाळ जिल्ह्यातील मुळगावी अंत्यसंस्कार करण्यात येणार आहेत. चालकाचा कर्तव्यावर असताना मृत्यू झाल्याने हळहळ व्यक्त होत आहे.
नागोराव मेश्राम यांनी पहाटे आगारातून सोयगाव ते धुळे जाणारी बस ( एम-एच-२० डी-०५८२ ) प्लॅटफॉर्म लावली. बसमध्ये प्रवासी बसण्यास सुरुवात झाली. मेश्राम यांनी नियंत्रण कक्षात बसची नोंद केली आणि कॅबीनमध्ये असले. यानंतर अचानक ते बेशुद्ध झाले. स्थानकातील कर्मचारी आणि नागरिकांनी त्यांना तातडीने सोयगाव ग्रामीण रुग्णालयात दाखल केले. प्रकृती चिंताजनक असल्याने त्यांना तातडीने पाचोरा ( जि.जळगाव ) येथे हलविण्यात आले. मात्र, पाचोरा रुग्णालयातील डॉक्टरांनी त्यांना तपासून मृत घोषित केले. त्यांच्यावर यवतमाळ जिल्ह्यातील मुळगावी अंत्यसंस्कार होणार आहेत.