‘त्या’ अधिकाऱ्यांवर कारवाईची मागणी

भाजपाची आक्रमक भूमिका : डॉक्टरवर हल्ला करणाऱ्यास व्हीआयपी वागणूक

ओरोस : जिल्हा रूग्णालयातील बालरोगतज्ज्ञ डॉ. विजय ढवळे यांच्यावर हल्ला करणाऱ्या संशयिताला व्हीआयपी वागणूक दिली होती. या पार्श्वभूमीवर भाजपच्या शिष्टमंडळाने जिल्हा पोलीस अधीक्षक संजयकुमार बाविस्कर यांची भेट घेतली. या प्रकरणातील अधिकाऱ्यांवर कडक कारवाई करावी, अशी मागणी यावेळी भाजपने केली.
जिल्हा रूग्णालयात प्रामाणिक काम करणारे डॉ. ढवळे यांच्यावर आजपर्यंत अनेक राजकीय आणि संशयित लोकांनी हल्ले केले आहेत. त्यामुळे जिल्ह्यात बाहेरून येणारे डॉक्टर हे आपल्याकडे येऊन काम करण्यास तयार होत नाहीत.
राजकीय हस्तक्षेप होत असल्यामुळे पोलीस संशयितांना अटक करू शकत नसल्यामुळे पोलिसांवरील जनतेचा विश्वास उडाला असल्याबद्दल बोलले जात आहे. त्यामुळे आज जिल्हा पोलीस अधीक्षक संजयकुमार बाविस्कर यांची भाजपच्या शिष्टमंडळाने भेट घेऊन संबंधितांवर योग्य ती कारवाई करावी व गुरूवारपर्यंत चौकशीचे आदेश देण्याचे बाविस्कर यांना शिष्टमंडळाने सांगितले.जिल्हा रूग्णालयाचे शल्यचिकित्सक डॉ. आर. डी. माने यांची भाजपच्या शिष्टमंडळाने भेट घेऊन डॉ. ढवळे व त्यांच्या वडीलांची विचारपूस केली. डॉ. ढवळे यांना मारहाण झाल्यानंतर असंख्य फोन आले, पण त्यावेळी कोणीही मदतीला धावून येऊ शकले नाही. आजच्या भेटीदरम्यान डॉ. ढवळे यांनी जिल्हा सोडून जाण्याचा निर्णय घेऊ नये व आपण आजपर्यंत जनतेची जी सेवा केली तशीच सेवा करावी. या रूग्णालयात लहान मुलांच्या आजाराविषयी ज्या अडचणी येतात त्या तुम्ही चांगल्याप्रकारे हाताळता. आज हजारो बालके तुम्ही चांगली केली आहेत.
जिल्हा रूग्णालयाला तुमच्यासारखा वैद्यकीय अधिकारी मिळाला आहे, अशी त्यांच्याकडे सर्वांनी विनवणी केली.
यावेळी भाजपचे शिष्टमंडळाचे माजी आमदार प्रमोद जठार, राजन तेली, काका कुडाळकर, प्रभाकर सावंत, राजश्री धुमाळे, अतुल काळसेकर, जयदेव कदम यांनी डॉ. आर. डी. माने व डॉ. विजय ढवळे यांची भेट घेतली. (वार्ताहर)