- संतोष हिरेमठ औरंगाबाद : औरंगाबादेतील जालना रोडवर रात्रीच्या वेळी दुचाकीवर बसून 'खुल्लम खुल्ला प्यार करेंगे'चा प्रकार समोर आला आहे. सोशल मिडीयावर हा व्हिडीओ चांगलाच व्हायरल झाला आहे.
हा व्हिडिओ नेमका कधीचा आहे, हे स्पष्ट झालेले नाही. आकाशवाणी चौकातून सेव्हन हिलकडे जाणाऱ्या एका चारचाकी वाहनातून हा व्हिडीओ चित्रित करण्यात आला आहे. यात एका दुचाकीवर एक युवक आणि युवती बिनधास्तपणे प्रेमात बुडून गेल्याचे दिसत आहे, अशा अवस्थेत दुचाकीही चालविली जात होती. रस्त्याने ये- जा करणारे अन्य वाहनचालक हा प्रकार पाहून खजील होत असल्याचे दिसून आले.
खतरनाक स्टंट, अपघाताला निमंत्रण शहरातील जालना रोड या मुख्य रस्त्यावर रात्रीच्या वेळी वर्दळ असते. या मार्गावर सतत मोठ्या प्रमाणावर वाहतूक सुरु असते. यात बाईकवरील हे कपल खतरनाक स्टंट करत असल्याचे दिसत आहे. यामुळे ते त्यांचा आणि इतरांचाही जीव धोक्यात टाकत होते. हा स्टंट म्हणजे अपघाताला निमंत्रणच असल्याच्या प्रतिक्रिया सोशल मीडियात उमटत आहेत.