सोमवारपासून हळद खरेदी

 हिंगोली : शहरातील कृषी उत्पन्न बाजार समितीच्या कॉटन मार्केटमधील कापसाची खरेदी बंद झाली आहे. आता या मार्केट यार्डमध्ये २ जूनपासून कापसाऐवजी हळदीची खरेदी केली जाणार आहे. हिंगोली बाजार समितीकडे जागेची मर्यादा आहे. मालाच्या आवकेच्या तुलनेत मोंढ्यातील तीन शेड अपुरे पडत आहेत. परिणामी शेतकर्‍यांना रस्त्यावर माल उतरावा लागत होता. यापुर्वी अनेकवेळा माल भिजल्याने उत्पादकांचे नुकसान झाले होते. त्यामुळे संतापलेल्या उत्पादकांनी काहीवेळा बाजार समितीच्या कार्यालयाची तोडफोड केल्याचा प्रकारही घडला. यामुळे बाजार समितीने मोंढ्याऐवजी कॉटन मार्केटमध्ये हळद खरेदी सुरू केली होती. त्यासाठी बाजार समितीने कापूस, हळद आणि सोयाबीन खरेदीचे दिवस निश्चित केले होते. शिवाय बाजार समितीने कॉटन मार्केटमध्ये दोन शेड उभारले होते. एका दिवसाआड कापूस आणि हळदीची खरेदी बाजार समितीच्या कॉटन मार्केटमध्ये झाली. आता उत्पादकांकडे माल नसल्याने कापूस खरेदीचा हंगाम संपला आहे. दरम्यान सहा महिने कॉटन मार्केटमध्ये दोन्ही पिकांची खरेदी झाली. यापुढे २ जुनपासून हळदीची खरेदी कायम राहणार असल्याची माहिती बाजार समितीचे सचिव सय्यद जब्बार पटेल यांनी दिली. (प्रतिनिधी)