औरंगाबाद : विधान परिषदेच्या पोटनिवडणुकीसाठी भारतीय जनता पार्टीतर्फे (BJP ) औरंगाबादचे शहर जिल्हाध्यक्ष संजय केनेकर ( Sanjay Kenekar ) यांची उमेदवारी निश्चित करण्यात आली आहे. काही महिन्यांपूर्वीच औरंगाबादमधील डॉ. भागवत कराड ( Dr. Bhagvat Karad ) यांना भाजपने केंद्रीय मंत्रिमंडळात राज्यमंत्रीपदी स्थान दिले आहे. यातच आता विधानपरिषदेसाठी संजय केनेकर यांना उमेदवारी निश्चित करण्यात आल्याने शिवसेनेचा बालेकिल्ला असलेल्या औरंगाबादवर भाजपचेही विशेष लक्ष असल्याचे दिसत आहे.
भाजप प्रदेशाध्यक्ष चंद्रकांत पाटील यांनी विधानसभेचे विरोधी पक्षनेते देवेंद्र फडणवीस यांच्यासह पक्षाच्या कोअर कमिटीच्या सदस्यांशी चर्चा करून संजय केनेकर यांचे नाव भाजपा, महाराष्ट्रतर्फे निश्चित केले आणि तशी शिफारस केली आहे. भाजपा राष्ट्रीय अध्यक्ष जगत प्रकाश नड्डा यांच्या अनुमतीने केंद्रीय निवडणूक समितीकडून संजय केनेकर यांची उमेदवारी लवकरच जाहीर होईल. निवडणूक अर्ज भरण्याची मुदत १६ नोव्हेंबर असून केंद्रीय समितीकडून नाव निश्चित झाल्यावर प्रमुख नेत्यांच्या उपस्थितीत संजय केनेकर लवकरच अर्ज दाखल करतील.
विधानसभा सदस्यांमार्फत होणारी ही निवडणूक भारतीय जनता पार्टी पूर्ण सामर्थ्यानिशी लढेल आणि जिंकेल, असा विश्वास चंद्रकांत पाटील यांनी व्यक्त केला आहे. तर मागील ३३ वर्षांपासून निष्ठेने काम केल्याने पक्षाने मोठी संधी दिली. पोटनिवडणुकीची लढत कठीण आहे. मात्र, महाआघाडीतील तिन्ही पक्षांमध्ये ताळमेळ नाही. यामुळे सरकारमधील सर्व आमदार नाराज आहेत. यातूनच चमत्कार करून भाजप ही निवडणूक जिंकेल असा विश्वास केनेकर यांनी व्यक्त केला.