- जी. श्रीकांत, आयुक्त तथा प्रशासक, छत्रपती संभाजीनगर महापालिकाछत्रपती संभाजीनगर : महापालिका प्रशासक म्हणून काम करताना अनेकदा अजितदादांना भेटण्याचा योग आला. त्यांचे छत्रपती संभाजीनगर शहरावर असलेले प्रेम, जिव्हाळा, कळवळा प्रत्येक वेळी दिसून येत होता. सर्वांत अगोदर ते एकच प्रश्न करीत असत. श्रीकांत शहराचा पाणीप्रश्न सोडवला का रे? मी त्यांना नवीन पाणीपुरवठा योजनेचे काम कुठपर्यंत आले ते सांगत असे. रस्ता रुंदीकरण मोहीम राबविली तेव्हासुद्धा त्यांनी कौतुक केले. मी कोणाला घाबरत नाही, तूसुद्धा अशाच पद्धतीने काम कर असे म्हणून ते मला ऊर्जा देण्याचे काम करीत आले. त्यांच्या अकाली जाण्याचे राज्याचे मोठे नुकसान झाले.
दादा १७ सप्टेंबर २०२४ रोजी स्मार्ट सिटीच्या कार्यालयात आले. ७५० सीसीटीव्हीचे कमांड सेंटर, कचरा संकलन पद्धत, शाळेत गैरहजर राहणाऱ्या विद्यार्थ्यांसाठी सुरू केलेले सावित्री कक्ष, आदी अनेक नावीन्यपूर्ण उपक्रम पाहून ते भारावून गेले. या उपक्रमांंची माहिती घेण्यासाठी बारामतीहून अधिकाऱ्यांचे एक पथक पाठविले. शहरात एक चांगले स्कील सेंटर असावे अशी इच्छा त्यांनी अनेकदा बोलून दाखविली. शहर स्वच्छ व सुंदर असावे, रस्ते अतिक्रमणमुक्त असावेत ही त्यांची इच्छा होती. अनेक सार्वजनिक कार्यक्रमांमध्ये दादांनी तसे बोलूनही दाखविले. डीपीडीसीची बैठक असो किंवा मंत्रालयात मंत्रिमंडळाची बैठक असो, पाहताच क्षणी श्रीकांत काय झाले रे... असे म्हणत संवाद पुढे सुरू होत होता. त्या ‘रे’ या एकमेव शब्दात प्रचंड आपुलकीचा भाव असायचा. सकाळी ७ वाजेपासून कामाला सुरू करणे ही पद्धत मला खूप आवडत होती. त्यामुळे मीसुद्धा सकाळीच बैठका घेणे सुरू केले. माझ्या लग्नाची पत्रिका देण्यासाठी एकदा गेलो असता त्यांनी आस्थेवाईकपणे सर्व चौकशी केली. लग्नाला येता येणार नाही, हेसुद्धा सांगितले आणि शुभेच्छा दिल्या.
सोबत जेवण केले...आ. सतीश चव्हाण यांच्या घरी त्यांच्यासोबत केलेले जेवण ही माझी व त्यांची शेवटची भेट ठरली. तेव्हाही त्यांनी रस्ता रुंदीकरण मोहिमेचे कौतुक केले. आज तुझ्यावर आरोप होत असले तरी काही हरकत नाही. उद्या हेच लोक तुझी स्तुती करतील, असे दादा म्हणाले होते. या भेटीतही त्यांनी पाणी योजना कुठपर्यंत आली, शहराला पाणी कधी मिळेल असे विचारले. योजनेला पैसे कमी पडणार नाहीत असे आश्वासनही दिले होते.(शब्दांकन- मुजीब देवणीकर)
Web Summary : Ajit Dada prioritized solving Chhatrapati Sambhajinagar's water issues and infrastructure. He consistently inquired about the water supply project's progress, offering support and resources. His dedication to the city's development was evident in his interactions and encouragement.
Web Summary : अजित दादा ने छत्रपति संभाजीनगर की पानी की समस्या और बुनियादी ढांचे को हल करने को प्राथमिकता दी। उन्होंने लगातार जल आपूर्ति परियोजना की प्रगति के बारे में पूछताछ की, सहायता और संसाधन प्रदान किए। शहर के विकास के प्रति उनका समर्पण उनकी बातचीत और प्रोत्साहन में स्पष्ट था।