औरंगाबाद : प्रेमाच्या आणाभाका घेत अल्पवयीन मुलीवर लैंगिक अत्याचार करणारा तिचा प्रियकर महेश बागुल (नाव बदलले आहे) याला २९ जुलैपर्यंत पोलीस कोठडीत ठेवण्याचे आदेश सत्र न्यायाधीश ए.एस. खडसे यांनी मंगळवारी दिले.या अल्पवयीन मुलीवर लैंगिक अत्याचार करणाऱ्या मावस भावासह तिच्यावर बळजबरी करण्याचा प्रयत्न करून तिचा विनयभंग करणाऱ्या मावस काकांवर मुकुंदवाडी पोलीस ठाण्यात गुन्हा दाखल करण्यात आला आहे.
१७ वर्षांच्या पीडितेच्या आईने फिर्याद दिल्यानुसार, १८ जुलै रोजी पीडिता बेपत्ता झाली होती. तपास सुरू असताना २५ जुलै रोजी ती पोलीस ठाण्यात हजर झाली. तिने पोलिसांना दिलेल्या जबाबानुसार, २०१८ मध्ये ती ९ वीत असताना तिची आरोपी महेश याच्याशी ओळख झाली व मैत्रीचे रूपांतर प्रेमात झाले. २०१८ मध्येच मावस काकाने तिच्याशी लगट करण्याचा प्रयत्न करून तिचा विनयभंग केला होता.
एप्रिल २०१९ मध्ये आरोपी महेशने पीडितेवर लैंगिक अत्याचार केला. मे २०२२ मध्ये पीडिता बहीण व मावस भावांसह गच्चीवर झोपली असताना मावसभावाने पीडितेशी अश्लील चाळे करून तिचा विनयभंग केला. १४ जून रोजी मावस भावाने पीडितेला जलजिरा पिण्यासाठी दिला असता तिला चक्कर आली. त्यानंतर मावसभावाने तिच्यावर लैंगिक अत्याचार केला. या सर्व घटनांमुळे पीडिता मानसिकरीत्या खचली होती. त्यामुळे १८ जुलै रोजी ती घरातून निघून गेली.
तेथे महेश तिला घेण्यासाठी गेला. दोघे बदलापूर (जि. ठाणे) येथे त्याच्या काकाकडे गेले. २२ जुलै रोजी त्याने पीडितेवर लैंगिक अत्याचार केला. मुकुंदवाडी पोलीस तिचा शोध घेत असताना महेशच्या काकूने तिला मुकुंदवाडी पोलीस ठाण्यात आणले. आरोपीला मंगळवारी न्यायालयात हजर केले असता, सहायक लोकअभियोक्ता अरविंद बागुल यांनी आरोपीची पोलीस कोठडी मंजूर करून घेतली.