वाळूज महानगर : तिसगाव चौफुली परिसरात दि. २९ मे रोजी दुपारी साडेतीन वाजेच्या सुमारास विघ्नहर्ता ऑटो केअर या गॅरेजमध्ये पाच ते सहा जणांच्या टोळक्याने तुफान राडा घालत कामगारांना बेदम मारहाण केली. गॅरेजमध्ये उभ्या असलेल्या वाहनांचीही तोडफोड करण्यात आली असून, हा सर्व प्रकार सीसीटीव्ही कॅमेऱ्यात कैद झाला आहे.
प्राथमिक माहितीनुसार, गॅरेजमध्ये एका वाहनाचा बंपर फिट करण्याच्या कारणावरून वाद निर्माण झाला. त्यावेळी कामगार जेवण करत असताना, टोळक्यातील काहीजणांनी आत्ताच काम करा, अशी मागणी केली. गॅरेजमध्ये असलेल्या चौघांना जबर मारहाण केली. शॉकअप, टॉमी आणि ड्रम यासारख्या साधनांनी केलेल्या मारहाणीत ऋषिकेश काळे, राहुल लिंबे, कुणाल पवार व सौरभ दातार हे गंभीर जखमी झाले आहेत. त्यांना तातडीने शासकीय रुग्णालयात दाखल करण्यात आले आहे.
विघ्नहर्ता ऑटो केअर हे गॅरेज ऋषिकेश काळे आणि राहुल लिंबे यांच्या भागीदारीत सुरू आहे. या घटनेने परिसरात एकच खळबळ उडाली आहे. दरम्यान, घटनास्थळी एमआयडीसी वाळूज पोलिस दाखल झाले. त्यांनी सीसीटीव्ही फुटेज तपासून पुढील कारवाई सुरू केली आहे. या प्रकरणी संबंधित आरोपींचा शोध सुरू आहे. या प्रकारामुळे स्थानिक व्यावसायिकांमध्ये भीतीचे वातावरण निर्माण झाले आहे. सुरक्षेच्या उपाययोजनांबाबत तातडीने पावले उचलावीत, अशी मागणी स्थानिक नागरिकांकडून होत आहे.