छत्रपती संभाजीनगर : भडकल गेटकडून कर्करोग रुग्णालयाकडे भरधाव वेगात दुचाकीवरून (एमएच २० जीएन ५९१८) जात असताना टाउन हॉल उड्डाणपुलावर दुचाकी रस्त्याच्या कठड्याला धडकली. या भीषण अपघातात दोन युवकांचा जागीच मृत्यू झाला. ही घटना रविवारी मध्यरात्री १२.४० वाजता घडली.
अपघात एवढा भीषण होता की, दुचाकी रस्त्याच्या एका कडेला फेकली गेली, तर त्यावरील दोन्ही तरुण वेगवेगळ्या दिशांना लांब जाऊन पडले. दोघांचे डोके डांबराच्या रस्त्यावर आदळल्यामुळे प्रचंड रक्तस्राव झाला. त्यातच त्यांचा मृत्यू झाल्याचे उपस्थितांनी 'लोकमत'शी बोलताना सांगितले. अपघातामुळे परिसरात मोठा आवाज झाला. त्यामुळे टाउन हॉल परिसरातील अनेकांनी घटनास्थळी धाव घेतली. दोघांना रिक्षातून तात्काळ घाटी रुग्णालयात नेले. अपघाताच्या घटनेनंतर उशिराने बेगमपुरा पोलिस ठाण्यातील उपनिरीक्षक संजय मोरे सहकाऱ्यांसह घटनास्थळी दाखल झाले होते. अपघाताच्या घटनेची नोंद बेगमपुरा पोलिस ठाण्यात करण्यात आली. रात्री २ वाजेपर्यंत मयतांची ओळख पटली नव्हती.