छत्रपती संभाजीनगर : वेळ संपल्यामुळे हॉटेल बंद करीत असलेल्या मजुराशी ‘आम्हाला दारू पिण्यासाठी हॉटेल उघडे ठेव’ असे म्हणून तिघांनी वाद घातला. त्यानंतर मजुराच्या डोक्यात बीअरची बाटली फोडून गंभीर जखमी केल्याचा प्रकार ७ एप्रिल रोजी रात्री १०:३० वाजता रेल्वे स्टेशन रोडवरील हॉटेल अशोकासमोर घडला. याप्रकरणी वेदांतनगर पोलिस ठाण्यात गुन्हा नोंदविण्यात आला आहे.
लक्ष्मण बंगारिप्या मल्लेपोगू (१८, रा. पेदापाडू, ता. कोडमूर, जि. कुर्नूल), पठाण जुबेर अली खान पठाण कादर खान (रा. सन्यासरसिल, कडप्पा) यांच्यासह एका अनोळखी व्यक्तीचा आरोपीमध्ये समावेश आहे. गोपाल जैस्वाल यांनी दिलेल्या फिर्यादीनुसार ते रात्री १०:३० वाजेमुळे हॉटेलचे दरवाजे बंद करू लागले होते. तेव्हा आरोपींनी जैस्वाल यांच्यासोबत हुज्जत घातली. लोखंडी टोकदार वस्तूने मारहाण करीत जखमी केले. त्यातील एका बीअरची बाटली डोक्यात घातली. तसेच जखमी जैस्वाल यांना धमकी दिल्याचे फिर्यादीत म्हटले आहे. अधिक तपास वेदांतनगर पोलिस करीत आहेत.