१२वी पास तरुणाने सुरू केले गर्भलिंग निदान रॅकेट; युट्यूबवर व्हिडीओ पाहून शिकला, अखेर सापडला

न्यायालयाने त्यांना सात दिवसांची पोलिस कोठडी सुनावली आहे. 

लोकमत न्यूज नेटवर्क, छत्रपती संभाजीनगर : शहरात  गर्भलिंग निदान चाचणी करून गर्भपात करून देणारी नवी टोळी तयार झाली आहे. नारेगाव गर्भपाताच्या तपासात पोलिसांना मिळालेल्या माहितीमधून डॉ. सतीश सोनवणेच्या अटकेनंतर त्याचा चालक राहुल झोंड याने ऑनलाइन पोर्टेबल एक्सरे मशीन खरेदी करून हे धंदे सुरू केले होते.

झोंडचा साथीदार सोमनाथ बारासे याला शुक्रवारी अटक करण्यात आली.  नारेगाव मनपा रुग्णालयातील शिपाई शंकर आढाव यालाही अटक झाली.

असा उघड झाला प्रकार

७ मार्चला गर्भपाताचे रॅकेट चालविणारा डॉ. सोनवणे, जालन्यातील परिचारिका कमळ तीनगोटे, मयूर पार्क येथील महालॅब चालक अनिल जाधव (सपकाळ) यांनी  नारेगावात २६ वर्षीय विवाहितेचा घरातच गर्भलिंगनिदान करून गर्भपात केला. १३ मार्चला विवाहितेचा पती अरबाज फेरोज सय्यद, सासू आशिया फेरोज सय्यद, सासरा फेरोज मन्सूर सय्यद (सर्व, रा. बलूच गल्ली, नारेगाव) यांना अटक झाली. 

डमी पती-पत्नी पाठवून सापळा

पोलिसांना राहुलविषयी माहिती मिळाली. त्यानंतर त्यांनी डमी पती-पत्नीच्या माध्यमातून राहुलशी संपर्क साधून सापळा रचला. त्याला गर्भलिंग निदान करण्याबाबत विचारले. राहुलने २५ हजार रुपये सांगून पिसादेवी परिसरात बोलावले. ठरल्याप्रमाणे राहुल आणि त्याच्या साथीदाराने दाम्पत्याची भेट घेताच त्यांना पकडण्यात आले. त्यांच्या ताब्यातून पोर्टेबल मशीन, टॅब जप्त करण्यात आले. महापालिकेच्या वैद्यकीय अधिकाऱ्यांकडून पंचनामा करून त्यांना अटक करण्यात आली. न्यायालयाने त्यांना सात दिवसांची पोलिस कोठडी सुनावली आहे.