‘ते’ फुटपाथवरून पुन्हा रूग्णालयात

उपचार पूर्ण झाले नसतानाही बरे झाल्याचे सांगून रूग्णांना बाहेर घालविणारे जिल्हा सामान्य रूग्णालय अखेर गुरूवारी ‘लोकमत’मध्ये वृत्त प्रकाशित होताच वरमले. गंगाधर आणि भाऊराव नावाच्या या दोन्ही रूग्णांचा

रुग्णालयही वरमले : रुग्णवाहिकांनी घेतला गंगाराम आणि भाऊरावचा शोध
गोपालकृष्ण मांडवकर - चंद्रपूर
उपचार पूर्ण झाले नसतानाही बरे झाल्याचे सांगून रूग्णांना बाहेर घालविणारे जिल्हा सामान्य रूग्णालय अखेर गुरूवारी ‘लोकमत’मध्ये वृत्त प्रकाशित होताच वरमले. गंगाधर आणि भाऊराव नावाच्या या दोन्ही रूग्णांचा महाकाली मंदीर परिसरात शोध घेऊन रूग्णालयाच्या कर्मचाऱ्यांनी त्यांना पुन्हा उपचारासाठी रूग्णालयात नेले.
‘लोकमत’मध्ये या संदर्भात वृत्त प्रकाशित होताच एकच खळबळ उडाली. बातमीची दखल घेऊन जिल्हा शल्य चिकित्सक डॉ. मुरंबिकर यांनी परिचारक व डॉक्टरांसह अँब्युलन्स रवाना केली.
दरम्यान वृत्त वाचून या परिसरात अनेक नागरिक व सामाजिक कार्यकर्ते हजर झाले होते. शहर पोलीस ठाण्याचे पोलीस निरीक्षक सिरसकर यांनीही धाव घेतली होतीे. रूग्णालयाच्या पथकाने गंगाधार आणि भाऊराव या दोघांनाही अँब्युलन्समधून नेऊन उपचार सुरु केले आहेत.
‘लोकमत’मुळे गंगाधरला मिळाले नातेवाईक
लोकमतमध्ये हे वृत्त प्रकाशित होताच गंगाधरचे छायाचित्र बघून ब्रम्हपुरी तालुक्यातील नितीन भरडकर नामक व्यक्ती महाकाली मंदीर परिसरात पोहचली. गंगाधरला बघून ते आपले मामा असल्याची ओळख त्यांना पटली. गंगधार हे आपले मामा असून ब्रम्हपुरी तालुक्यातील खेडी येथील राहणारे आहेत. सात-आठ महिन्यांपूर्वी ते घरून निघून गेले होते. बऱ्याच ठिकाणी शोध घेऊनही सापडले नव्हते. ते हरविल्याची तक्रार ब्रम्हपुरी पोलिसातही दिली होती, अशी माहिती भरडकर यांनी दिली. लोकमतमुळे आपले मामा मिळाले, असे भावोद्गारही त्यांनी काढले. दरम्यान दुपारी गंगाधरचा मुलगाही खेडीवरून पोहचला. प्राथमिक उपचारानंतर नातेवाईकांनी त्याला गावाकडे नेले.