‘ते’ प्रत्येक ग्रामपंचायत निवडणुकीवर टाकतात बहिष्कार

Chandrapur News नागभीड तालुक्यात कोसंबी गवळीला लागून असलेल्या कोसंबी चक नावाचे एक गाव आहे. तेथील मतदार प्रत्येक ग्रा.पं.निवडणुकीवर बहिष्कार टाकतात. बहिष्काराचा हा क्रम त्यांनी यावेळीही कायम ठेवला.

 लोकमत न्यूज नेटवर्क  

चंद्रपूर: नागभीड तालुक्यात कोसंबी गवळीला लागून असलेल्या कोसंबी चक नावाचे एक गाव आहे. तेथील मतदार प्रत्येक ग्रा.पं.निवडणुकीवर बहिष्कार टाकतात. बहिष्काराचा हा क्रम त्यांनी यावेळीही कायम ठेवला.

             त्याचे होते असे की, कोसंबी गवळी आणि कोसंबीचक ही दोन्ही गावे एकच असली, तरी कागदोपत्री मात्र वेगवेगळी आहेत. या गावाच्या मध्ये फक्त एक रस्ता आहे. मात्र, कोसंबीचक या गावाला नेहमीच ग्रा.पं.निवडणुकीच्या वेळी सहा किमी अंतरावरील पारडी या ग्रामपंचायतीत समाविष्ट करण्यात येते.

             या गावातील जवळपास १२० मतदारांची सहा किमी अंतरावर असलेल्या पारडी ठवरे या ग्रामपंचायतींच्या मतदार यादीत नेहमीच नोंद होते. उल्लेखनीय, पंचायत समिती, जिल्हा परिषद, विधानसभा आणि लोकसभा निवडणुकीच्या वेळी हेच मतदार गावातच म्हणजे कोसंबी गवळी येथे मतदान करतात. नेमक्या ग्रामपंचायत निवडणुकीच्या वेळी या मतदारांची पारडी ठवरे या ग्रामपंचायतीच्या मतदार यादीत नोंद होते. १५ ते २० वर्षांपासून असे सुरू असल्याची माहिती आहे.

             ग्रा.पं.निवडणुकीच्या वेळीही आमची नावे इतर निवडणुकीसारखीच कोसंबी गवळी ग्रामपंचायतीच्या मतदार यादीत आली पाहिजेत, ही कोसंबीचकवासीयांची मागणी असली, तरी या मागणीकडे प्रशासनाचा नेहमीच कानाडोळा होत आहे. एवढेच नाही, तर लक्ष वेधण्यासाठी पारडी ठवरे ग्रा.पं.च्या निवडणुकीवर यापूर्वी अनेकदा बहिष्कारही टाकला, पण त्यांना न्याय मिळाला नाही. न्याय न मिळाल्याने त्यांनी यावेळीही मतदानावर बहिष्कार टाकला.

मागील १५ वर्षांपासून त्यांचा प्रस्ताव प्रशासनाच्या लालफीतशाहीत अडकला आहे. मी स्वतः अनेकदा ही नावे कोसंबी गवळी ग्रा.पं.च्या यादीत समाविष्ट करण्यात यावी, म्हणून पाठपुरावा केला आहे, पण नेहमीच चालढकल करण्यात येत आहे. शेवटी वैतागून मतदार मतदानावर बहिष्कार टाकतात. या मतदारांनी यावेळी बहिष्कार टाकला.

- संजय गजपुरे, जि.प.सदस्य