वाढोणा येथे शाळाबाह्य मुलांसाठी शिक्षकांची बैठक

सावरगाव : नागभीड तालुक्यातील वाढोणा येथे शासनाच्या शिक्षण विभागाने ठरविलेल्या आदेशात्मक धोरणानुसार शाळाबाह्य मुलांचे सर्वे करण्याकरिता ग्रामपंचायत कार्यालयात शिक्षकांची बैठक घेण्यात आली.

यामध्ये घरोघरी जाऊन शिक्षक सर्व्हे करणार असल्याचे ठरविले.

वाढोणा या गावाची लोकसंख्या जवळपास पाच हजारांहून अधिक असून, येथे जिल्हा परिषद प्राथमिक शाळा आहे. येथे १ ते ४ वर्ग आहेत. शिवाय समाज सेवा विद्यालय या खासगी शाळेत वर्ग ५ ते १०पर्यंत शिकविल्या जाते. दरम्यान, येथील विद्यार्थी शिक्षणापासून वंचित राहू नये, यासाठी ग्रामपंचायत कार्यालयात शिक्षकांची बैठक पार पडली.

कोविड-१९ या जागतिक रोगाच्या प्रादुर्भावामुळे शाळा बंद पडल्याने मुलांच्या नियमित शिक्षणात अडथळा निर्माण झाला. परिणामी काही पालकांनी मुलांची नावे शाळेत दाखल केली नाहीत. ऑनलाइन शिक्षणास सुरुवात केली. मात्र विद्यार्थ्यांची उपस्थिती शाळेच्या हजेरीपटावर नोंदविली गेली नाही. दोन महिन्यांपासून माध्यमिक शाळा सुरू करण्यात आल्या आहेत. मात्र इयत्ता १ ते ४ वर्गांपर्यंत शाळा अजूनही कोरोना महामारीच्या भीतीमुळे बंदच आहेत. शिक्षण विभागाच्या आदेशानुसार येथील शिक्षक ६ ते १४ या वयोगटांतील मुलांचा घरोघरी जाऊन सर्व्हे करणार आहेत. याप्रसंगी बैठकीत सरपंच देवेंद्र गेडाम, उपसरपंच भगवान बन्सोड समाजसेवा विद्यालयाचे मुख्याध्यापक दिलीप बुलबुले, जि. प. प्राथमिक शाळेचे मुख्याध्यापक नंदेश्वर बोरकर, सहायक शिक्षक संजय डोर्लीकर, सहायक शिक्षक रूपेश डोर्लीकर, जे. सी. बोरकर, नागदेवते, मुखरू देवेवार उपस्थित होते.