‘ त्या’ कर्मचाऱ्यांवर तातडीने कारवाई करा

शंकरपूर

:

चिमूर तालूक्यातील प्राथमिक आरोग्य केन्द्रातील कंत्राटी कर्मचारी हे आपल्या वैद्यकीय अधिकाऱ्यांचे आदेश पाळत नसून उलट अरेरावीची भाषा वापरतात. भिसी आरोग्य केन्द्रातसुध्दा कंत्राटी कर्मचाऱ्यांनी वैद्यकीय अधिकाऱ्यांशी असभ्य वर्तणूक केली. अशी अरेरावी करणाऱ्या कंत्राटी कर्मचाऱ्यांवर तात्काळ कारवाई करण्याची मागणी चिमूर तालूक्यातील सर्व वैद्यकीय अधिकारी तसेच सर्व समुदाय आरोग्य अधिकाऱ्यांनी तालुका वैद्यकीय अधिकारी यांना निवेदन देऊन केली आहे.

भिसी येथील प्राथमिक आरोग्य केन्द्रात कंत्राटी तत्वावर कार्यरत परिचारिका बर्वे तथा भटेले यांनी येथील वैद्यकीय अधीकारी प्रियंका कष्टी तसेच डॉ. श्रीकांत काळे यांच्यावर आपल्याला मारहाण करुन शिवीगाळ केल्याचा आरोप केला. तसेच स्वत:च्या अंगावर स्पिरीट ओतून आत्महत्येची धमकी दिली होती. याबाबत दोघांनीही पोलिसात तक्रार केली. दोन्ही तक्रारींची दखल घेत भिसी पोलिसांनी अदखल पात्र गुन्ह्याची नोंद केली.

आम्ही सर्व वैद्यकीय अधीकारी अशाच प्रकारचा मानसिक त्रास सहन करीत आहोत. कंत्राटी कर्मचाऱ्यांना काम सांगितल्यास त्या उलट आम्हालाच दमदाटी करतात व संघटनेची धमकी देतात, अशा अरेरावी करणाऱ्या कंत्राटी कर्मचाऱ्यांवर तात्काळ कारवाई करण्याची मागणी डॉ. राजेश कोवाके, डॉ. सुजाता शंभरकर, डॉ. मीनल पेटकर, डॉ. रितेश उमरे व चिमुर तालूक्यातील सर्व वैद्यकीय अधिकाऱ्यांनी केली आहे.