घनकचरा प्रकल्पाचे ग्रहण सुटता सुटेना !

चंद्रपुरातील महत्त्वाकांक्षी घनकचरा व्यवस्थापन प्रकल्पाला लागलेले ग्रहण अनेक वर्षांनंतरही सुटू शकले नाही. घनकचरा प्रकल्पाचे कंत्राट दिल्यानंतर मनपाने जागा दिली नाही म्हणून संबंधित कंत्राटदाराने

मनपा करणार कारवाई : जागा देऊनही कामे ठप्प
चंद्रपूर: चंद्रपुरातील महत्त्वाकांक्षी घनकचरा व्यवस्थापन प्रकल्पाला लागलेले ग्रहण अनेक वर्षांनंतरही सुटू शकले नाही. घनकचरा प्रकल्पाचे कंत्राट दिल्यानंतर मनपाने जागा दिली नाही म्हणून संबंधित कंत्राटदाराने ११ लोटल्यानंतरही कामाचा शुभारंभ केला नाही. आता मनपाने जागाही उपलब्ध करून दिली. तरीही हे काम रखडलेलेच आहे. त्यामुळे हा प्रकल्प चंद्रपुरात कार्यान्वित होणार की नाही, असा प्रश्न निर्माण झाला आहे.
चंद्रपुरात महानगरपालिका अस्तित्वात आली आहे. चंद्रपूर शहर झपाट्याने वाढत असून लोकसंख्याही त्या तुलनेत वाढत आहे. चंद्रपुरातून दररोज १३० ते १४० टन कचरा निघतो. एवढ्या मोठ्या प्रमाणात घनकचरा बाहेर पडत असतानाही चंद्रपुरात आजवर घनकचरा प्रकल्प उभा होऊ शकला नाही. याशिवाय घनकचऱ्याच्या व्यवस्थापनाबाबतही चंद्रपूर दुर्देवीच ठरले. चंद्रपूरमध्ये नगरपालिका अस्तित्वात असताना घनकचरा व्यवस्थापनाचे धिंडवडेच उडाले होते. त्यानंतर आता मागील वर्षी नागपूर येथील एका कंपनीला घनकचरा उचलण्याचे कंत्राट देण्यात आले. घनकचरा उचलणे आणि डम्पींग यार्डवर टाकणे एवढेच या कंपनीकडे काम आहे. घनकचरा प्रकल्पासाठी महानगरपालिकेला कधी कंत्राटदारच मिळाला नाही. नगरपालिका अस्तित्वात असतानापासून केवळ निविदा काढण्याचेच काम केले जात होते. कंत्राटदाराकडून प्रतिसाद मिळत नव्हता. दरम्यान दीड वर्षापूर्वी नागपूर येथील मे. कन्यका नॉन कन्व्हेशनल एनर्जी प्रा. लि. या कंपनीला या प्रकल्पासाठी कंत्राट देण्यात आले.
विशेष म्हणजे, ४ जून २०१३ रोजी वर्क आर्डरही देण्यात आला. या कामासाठी मनपाकडून २० एकर जागा देण्याचे ठरविण्यात आले. यातील तीन एकर जागा सपाटीकरण करून देण्याचेही ठरले. मात्र मनपाने जागा सपाटीकरण करून दिली नाही, म्हणत ११ महिन्यांपर्यत कामाचा शुभारंभच केला नाही. आता काही महिन्यापूर्वी महानगरपालिकेने संबंधित कंत्राटी कंपनीला जागा सपाटीकरण करून दिली. आता काम धडाक्यात सुरू होऊन प्रकल्प लवकरच कार्यान्वित होईल, अशी अपेक्षा होती. मात्र ही अपेक्षाही फोल ठरत असल्याचे दिसून येत आहे. या प्रकल्पाचे बजेट मोठे असल्याने मे. कन्यका कंपनीने प्रकल्पासाठी लोन केस केली असून अद्याप लोनची रक्कम मिळायची आहे, असे कारण सदर कंपनीकडून सांगण्यात येत आहे. ते काहीही असले तरी प्रकल्पाचे काम अजूनही थंडबस्त्यात आहे. त्यामुळे हा प्रकल्प सध्यातरी चंद्रपूरकरांसाठी मृगजळच ठरला आहे. (शहर प्रतिनिधी)