आतापर्यंत ५० हजार १६ जणांनी घेतला प्रतिबंधात्मक डोस

कोरोना प्रतिबंधासाठी ६० वर्षे तसेच ४५ वर्षांवरील व्याधीग्रस्त व्यक्तींना लस घेताना अडचणी येऊ नये, याकरिता सर्व उपजिल्हा ीुरुग्णालय, ग्रामीण रुग्णालय व १८ प्राथमिक आरोग्य केंद्रांतही कक्ष सुरू झाले होते. दुसऱ्या टप्प्यात केंद्रांची संख्या पुन्हा वाढविण्यात आली. जिल्ह्यात सद्यस्थितीत ६८ केंद्रांवर प्रतिबंधात्मक लसीकरण सुरू आहे. प्रतिबंधात्मक लसीचा दुसरा डोस घेण्यासाठी प्रत्येक केंद्राला उद्दिष्ट देण्यात आले. त्यानुसार सायंकाळी ५ वाजेपर्यंत दररोजची उद्दिष्ट्यपूर्ती होत आहे. जिल्हा प्रशासनाने राज्याच्या आरोग्य विभागाकडे लसींची मागणी नोंदविल्यानंतर शुक्रवारी लसींचे ४९ हजार ८०० डोस मिळाले. त्यातील केवळ कोविडशिल्डचे डोस जिल्ह्यातील सर्व केंद्रांना पाठविण्यात आले.

‘कोव्हॅक्सिन’ लस अद्याप वितरणाविना

पहिल्या टप्प्यात लसीकरणासाठी सीरम इन्स्टिट्यूटची ‘कोव्हिशिल्ड’ लस पाठविण्यात आली. दुसऱ्या टप्प्यातील मागणीनुसार, राज्य सरकारने भारत बायोटेकच्या ‘कोव्हॅक्सिन’ लसीचे ४ हजार ८०० डोस पहिल्यांदाच पाठविले. ही लस अत्यंत कमी तापमानात साठवून ठेवावी लागते. त्यामुळे स्वतंत्र केंद्रासह अन्य सुविधा पूर्ण झाल्यानंतरच ही लस वितरण केली जाणार आहे.

९ हजार ८९२ जणांचा दुसरा डोस पूर्ण

जिल्ह्यातील ९ हजार ८९२ हेल्थ केअर आणि फ्रन्टलाईन वर्करनी कोरोना लसीचा दुसरा डोस पूर्ण केला. सोमवारी १० हजार १९४ फ्रन्टलाईन वर्करनी पहिली डोस घेतली.

वेकोलिच्या तीन रुग्णालयातही प्रारंभ

यापूर्वी वेकोलिच्या रुग्णालयात लस देण्यास मंजुरी मिळाली नव्हती. मात्र सोमवारपासून माजरी, घुग्घुस व सास्ती येथील वेकोलिच्या रुग्णालयात कोरोना प्रतिबंधक लस देण्यास सुरुवात झाली आहे. याशिवाय गडचांदूर ग्रामीण रुग्णालय व जिवती तालुक्यात पाटणा आरोग्य केंद्रात डोस देणे सुरू झाले.

बाबूपेठ व इंदिरानगरातही केंद्र

चंद्रपूर मनपा आरोग्य विभागाकडून चार केंद्रांमध्ये लस दिली जात होती. त्यामध्ये पुन्हा बाबूपेठ व इंदिरानगरात दोन केंद्रांची भर पडली. लक्ष्मीनारायण मंदिराजवळ व वडगाव येथेही केंद्र सुरू होणार आहे.