रेती तस्करीचा ट्रॅक्टर अखेर गावकऱ्यांनीच पकडला

सावली : सावली तालुक्याला वरदान ठरणारी वैनगंगा नदी. याच नदीच्या पात्रातून रोज ट्रॅक्टर, हायवाद्वारे रेतीची चोरटी वाहतूक केली जाते. मात्र याकडे संबंधित विभागाचे दुर्लक्ष होत असल्याने अखेर तालुक्यातील निलसनी पेडगाव येथील गावकऱ्यांनी पुढाकार घेऊन पहाटेपासून ट्रॅक्टरद्वारे चालणारी चोरट्या रेतीची वाहतूक अडवून ट्रॅक्टर पकडल्याची घटना रविवारी पहाटेच्या सुमारास घडली.

रोज धावणाऱ्या चोरट्या रेतीच्या वाहतुकीने गावकरी त्रस्त झाले होते. त्यामुळे गावातून रोज पहाटे सुरू होणारी अवैध रेतीची वाहतूक थांबविण्यात यावी, अशी मागणी अनेकदा ग्रामस्थांनी संबंधित विभागाकडे केली होती. तालुक्यातील निलसनी पेडगावची सीमा ही वैनगंगा नदीला लागून आहे. खनिज संपत्तीने विपुल असलेल्या या घाटावरून रात्रीच्या सुमारास अवैध रेतीची वाहतूक मोठ्या प्रमाणात चालते. याची माहिती प्रशासनालासुद्धा आहे. परंतु याकडे दुर्लक्ष केल्याने अखेर गावकऱ्यांनी अवैध रेती भरलेला ट्रॅक्टर जप्त केला. त्यामुळे रेती माफियांमध्ये खळबळ उडाली आहे. सदर घटनेची माहिती प्रशासनाला देऊन अवैध रेती भरलेला ट्रॅक्टर प्रशासनाचा स्वाधीन करण्यात आला. तालुक्यात सध्या रेती घाटाचा लिलाव झाला नसून, अनेक रेतीघाटावरून रेतीची चोरटी वाहतूक होत आहे. या सर्व प्रकारात प्रशासन मात्र उदासीन असल्याचे तालुक्यात चित्र आहे.