पेट्रोल, डिझेल दरवाढीमुळे सामान्यांचे बजेट कोलमडले

चंद्रपूर : मागील काही दिवसापासून पेट्रोल, डिझेलचे दर झपाट्याने वाढले आहे. त्यामुळे बाजारपेठेतील इतरही वस्तूंच्या किमतीवर त्याचा परिणाम पडला आहे. पूर्वी पेट्रोल, डिझेलची दरवाढ झाली तर मोठी खळबळ माजायची, विविध राजकीय पक्ष, सामाजिक संघटना रस्त्यावर उतरून आंदोलन करायच्या. मात्र आता या संघटनांच्या आंदोलनाची धार कमी झाली असून भाववाढीचे काहीही देणेघेणे नसल्याचे चित्र आहे. दरम्यान, काही राजकीय पक्षांनी आंदोलन करून लक्ष वेधण्याचा प्रयत्न केला आहे.

पेट्रोल डिझेलच्या किमती या आंतरराष्ट्रीय बाजारपेठेतील घडामोडींवरून ठरतात. या किमती नियंत्रणात ठेवणे हे केंद्र सरकारवर बऱ्याच प्रमाणात अवलंबून असते. मात्र मागील काही वर्षात सातत्याने पेट्रोल तसेच डिझेलचे दर वाढत आहे. सध्या पेट्रोलचे दर लिटरमागे शंभरी गाठतेय की काय, असे सामान्यांना वाटत आहे. इंधनाचे दर वाढल्यामुळे प्रवासभाडे महागले आहे. दळवळणाच्या ट्रान्सपोर्टच्या किमतीही आकाशाला भिडल्या आहेत. यातून प्रत्येक वस्तू महागली असून सर्वसामान्यांचे बजेट कोलमडले आहे. कोरोना संकटामुळे मेटाकुटीस आलेले नागरिक या भाववाढीमुळे अधिकच चिंतेत पडले आहे. मागील काही वर्षामध्ये पेट्रोल, डिझेलच्या किमती नियंत्रणात आल्या नाही. यामध्ये सातत्याने वाढ होत आहेत. त्यामुळे कमाई कमी आणि खर्च अधिक अशी अवस्था सामान्यांची झाली आहे.

पेट्रोल, डिझेलचे दर ( प्रति लिटर)

जानेवारी २०१७

६०.९७

७७.७५

जानेवारी २०१८

६४.४६

७८.८८

जानेवारी २०१९

६६.७५

७६.७५

जानेवारी २०२०

७२.३०

८२.८०

जानेवारी २०२१

८१.९५

९२.१५

बाॅक्स

बाजारपेठेवर परिणाम

१) पेट्रोल, डिझेलचे भाव वाढल्यामुळे मोठ्या प्रमाणात बाजारपेठेवर परिणाम पडला आहे. प्रत्येक वस्तूच्या किमती वाढल्या आहेत. त्यामुळे सामान्य नागरिकांचा खिसा रिता होत आहे. खासगी वाहनांचेही दर आकाशाला भिडले आहे. त्यामुळे सामान्य माणूस बाहेर न फिरता घरीच राहणे पसंत करीत आहे. अनेकांनी सायकलचा वापर करणे सुरू केले आहे. यातून व्यायाम आणि आर्थिक बचतीचे गणित मांडले जात जात आहे.

२) इंधन दरवाढीचा फटका जीवनावश्यक वस्तूंच्या दरवाढीलाही बसला आहे. भाजीपाला तसेच इतर जीवनावश्यक साहित्याचे दर वाढले आहे. या साहित्याचे दर वाढले असले तरी सामान्यांंच्या मिळकतीमध्ये वाढ झाली नाही. त्यामुळे खर्च अधिक आणि उत्पन्न कमी अशी काहीशी अवस्था झाली आहे. त्यामुळे इंधन दरवाढ कमी करून सामान्यांना दिलासा देणे गरजेचे आहे.

----

- नितीन भटारकर

अध्यक्ष, राष्ट्रवादी युवक काँग्रेस, चंद्रपूर

----

संदीप गिऱ्हे

जिल्हाप्रमुख , शिवसेना

----