कर चुकविणाऱ्यांवर कसणार लगाम

चंद्रपूरची लोकसंख्या अलिकडे झपाट्याने वाढली आहे. त्यामुळे बाजारपेठाही वाढल्या आहे. निवासी इमारतींचे व्यावसायिक इमारतींमध्ये रुपांतर झाले आहे. मात्र मनपाच्या कागदावर

हालचालींना वेग : नागरिकांच्या संपत्तीचे होणार फेरमूल्यांकन
चंद्रपूर : चंद्रपूरची लोकसंख्या अलिकडे झपाट्याने वाढली आहे. त्यामुळे बाजारपेठाही वाढल्या आहे. निवासी इमारतींचे व्यावसायिक इमारतींमध्ये रुपांतर झाले आहे. मात्र मनपाच्या कागदावर या इमारती निवासीच आहे. आता कर चुकविणाऱ्यांविरुध्द मनपाने मोहीमच आरंभली असून नागरिकांच्या संपत्तीचे फेरमूल्यांकन होणार आहे. यासाठी पुन्हा कर्मचाऱ्यांकडून सर्वेक्षण केले जाणार आहे.
अलिकडच्या काळात चंद्रपूर शहरात अनेक बदल घडून आले आहेत. औद्योगिक जिल्हा असल्याने चंद्रपूर शहराचे महत्त्व वाढले आहे. याशिवाय शहराची लोकसंख्या झपाट्याने वाढली आहे. सहाजिकच व्यापारीकरणही वाढले आहे. त्यामुळे बहुतांश नागरिकांनी आपल्या निवासी इमारतींमध्ये फेरबदल करीत येथे व्यापारी प्रतिष्ठाने काढली आहे. इमारतींमध्ये व्यापारी प्रतिष्ठाने असली की या इमारतींचे व्यावसायिक इमारतींमध्ये रुपांतरण होते. अशा इमारतींचा महानगरपालिकेकडे जो रेकॉर्ड असतो, त्यातही बदल केला जाणे अपेक्षित आहे. त्यानुसार गृहकर आकारला जातो. सहाजिकच निवासी इमारतींपेक्षा व्यावसायिक इमारतींसाठी जास्त कर आकारला जातो. मात्र हा कर वाचविण्यासाठी नागरिकांकडून मनपा कर्मचाऱ्यांची मनधरणी केली जात आहे. यातून पुढे अर्थकारणही होत असल्याचे शंका आहे. याचाच परिणाम म्हणून मनपाच्या रेकॉर्डवर शहरातील अनेक अशा इमारती व्यावसायिक इमारतीत रुपांतरित होऊ शकल्या नाही. त्यामुळे अशा इमारतीचे मालक निवासी इमारतींचाच कर भरीत होते.
याशिवाय एखाद्या इमारतीत भाडेकरू राहत असेल तर त्याच्या भाड्याच्या तुलनेत मनपाकडून कर आकारला जातो. मात्र मनपाजवळच्या कागदपत्रात अनेक इमारतींमध्ये भाडेकरू असतानाही दाखविले जात नाही. या कर चुकवेगिरीमुळे दरवर्षी मनपाला कोट्यवधींचा फटका बसत होता.
दरम्यान मागील महिन्यात शहरातील प्रतिष्ठीत डॉक्टर कुबेर कोतपल्लीवार यांच्या व्यावसायिक इमारतीसाठी परवानगी देताना कर चोरीला पाठबळ देण्याचा आरोप ठेवून मनपातील प्रभारी कर पर्यवेक्षक ए.एम.बेग यांना त्यांनी तडकाफडकी निलंबित केले होते. यामुळे मनपात खळबळ उडाली होती. शहरात असे अनेक प्रकार होत असल्याची शंका असल्याने आता मनपाचे आयुक्त सुधीर शंभरकर यांनी या करचुकवेगिरीवर अंकूश लावण्याचा निर्णय घेतला आहे.
नागरिकांवर थेट कारवाई नको म्हणून नागरिकांच्या संपत्तीचे फेरमुल्यांकन केले जाणार आहे. यासाठी महानगरपालिकेतील कर विभागातील कर्मचाऱ्यांचे पथक तयार करण्यात येणार असून या पथकाद्वारे शहरातील इमारतींचे पुन्हा सर्वेक्षण केले जाणार आहे. या कामात पुन्हा कुचराई करणाऱ्या कर्मचाऱ्यांवरही कारवाई केली जाणार आहे. यासंदर्भात मनपाचे आयुक्त सुधीर शंभरकर यांच्याशी वारंवार संपर्क साधला असता त्यांनी प्रतिसाद दिला नाही. (शहर प्रतिनिधी)