जोगापूर जंगलात लोकसहभागातून पर्यटन सफारी

जंगल सफारीसाठी जोगापूर परिसरातील वनक्षेत्र पोषक आहे. गाववस्ती व शेती नसलेले घनदाट जंगल पर्यटकांसाठी आकर्षण ठरू शकते. वन विभाग व ग्रामस्थांच्या सहकार्याने जोगापूर जंगल परिसरातील बैलगाडी रस्ते व कूप रस्ते, जंगल नियमित गस्तीच्या रस्त्यांचा वापर करून ४० किमी अंतराचे कच्चे रस्ते तयार केले. लोकसहभागातून वन्यजीव व्यवस्थापन, मानव व वन्यजीव यांच्यातील सहजीवन प्रस्थापित करणे, वनाचे शाश्वत जतन करून अवलंबन कमी करण्याचे नियोजन राजुरा वनपरिक्षेत्र कार्यालयाने केले. पायाभूत कामे पूर्ण झाल्यानंतर शनिवारपासून पर्यटनाला आमदार सुभाष धोटे यांच्यासमक्ष सुरुवात झाली.

जोगापूर जंगलाचे वैशिष्ट्य काय?

जोगापुरातील जंगलात विविध वन्यप्राणी, खडकी तलाव, बोर तलाव, पिपरबोडी, भिवकुंड, सिंगागुफा, पिवळा पाणी, बाबापूर मंदिर, सिंचन तलाव, धावडाबोडी, वाच टॉवर, खिरणी व दौड तलाव, इमली गुफा, गोमती पूल, जोगापूर मंदिर, कविची शिळ, वाघ नाला, निळा व लाल तलाव, कासला गोटा पर्यटकांना आकर्षित करू शकतात. २०० झाडे, २५० प्रकारचे पक्षी व विविधरंगी फुलपाखरेही बघायला मिळतात. राजुरा ते आसिफाबाद मार्गावर जोगापूर पर्यटन क्षेत्राचे मुख्य प्रवेशद्वार आहे. प्रति वाहन शुल्क ५०० तर गाईड शुल्क ३५० रुपये असे एकूण ८५० रुपयात पर्यटनाचा आस्वाद घेता येईल.

कोट

सकाळी ६ ते १० वाजता व दुपारी २ ते सायंकाळी ६ वाजतापर्यंत सकाळी ६ वाहन व दुपारी ६ वाहनांना प्रवेश देण्यात येईल. सुरुवातीला प्रायोगिक तत्त्वावर खासगी वाहन प्रवेश व भविष्यात केवळ नोंदणीकृत वाहनांनाच परवागनी देण्यात येणार आहे.

- विदेशकुमार गलगट, वनपरिक्षेत्र अधिकारी, राजुरा.