जनता करिअर लाँचरचा निकाल बनावट

जनता करिअर लाँचरच्या नावाने आयआयटी आणि वैद्यकीय पूर्वपरीक्षेचे शिकवणी वर्ग घेणाऱ्या जनता करिअर लाँंचरच्या संचालकांनी नापास झालेल्या विद्यार्र्थ्यांना ...

चंद्रपूर : जनता करिअर लाँचरच्या नावाने आयआयटी आणि वैद्यकीय पूर्वपरीक्षेचे शिकवणी वर्ग घेणाऱ्या जनता करिअर लाँंचरच्या संचालकांनी नापास झालेल्या विद्यार्र्थ्यांना पास झाल्याचे दाखवून पालक आणि विद्यार्थ्यांची दिशाभूल केल्याचा आरोप महाराष्ट्र नवनिर्माण सेनेचे जिल्हा संघटक राजू कुकडे यांनी पत्रकार परिषदेत केला. या प्रकरणी जनता करिअर लाँचरच्या संचालकांवर कारवाई करण्याची मागणी त्यांनी केली आहे.
कुकडे यांनी दिलेल्या माहितीनुसार, केंद्रीय माध्यमिक बोर्डाने अलीकडेच २७ एप्रिलला जेईई (मेन) २०१५ चे निकाल जाहीर केले होते. या परीक्षेत आपल्या जनता करिअर लाँचरमधील पैकीच्या पैकी म्हणजे १८ विद्यार्थी उत्तीर्ण झाल्याचे त्यांनी जाहिरातीमधून दाखविले होते. प्रत्यक्षात जाहिरातीमध्ये प्रकाशित केलेल्या १८ विद्यार्थ्यांपैकी १३ विद्यार्थी जेईई (मेन) परीक्षा उत्तीर्णच झाले नसल्याचा आरोप कुकडे यांनी केला. त्यापैकी नऊ विद्यार्थ्यांच्या गुणपत्रिका आपल्या हाती लागल्याचा दावाही त्यांनी केला आहे. बनावट निकाल दाखवून विदर्भातील विद्यार्थी आणि पालकांची दिशाभूल करण्याचा प्रकार येथे सुरू आहे. विद्यार्थ्यांचा आपल्या संस्थेत प्रवेश मिळवून त्यांच्याकडून वारेमाप शुल्क वसूल केली जाते, असाही आरोप त्यांनी केला आहे. जनता करिअर लाँचरचे संचालक असलेले डॉ. अशोक जीवतोडे यांच्यावर कारवाई करण्यासाठी त्यांनी जिल्हा पोलीस अधीक्षकांकडे तक्रार दाखल केली आहे. या सोबतच, शिक्षणमंत्री, शिक्षण उपसंचालकांकडेही तक्रारी केल्याची माहिती त्यांनी दिली आहे. (जिल्हा प्रतिनिधी)
आरोप पूर्णत: खोटे - जीवतोडे
जनता करिअर लाँचरचे संचालक डॉ. अशोक जीवतोडे यांची या संदर्भात प्रतिक्रिया घेतली असता ते म्हणाले, आमची संस्था जबाबदार आहे. त्यामुळे असा प्रकार संस्थेकडून होऊच शकत नाही. लवकरच दहावीच्या परीक्षेचे निकाल आहेत. त्यामुळे विद्यार्थी ओढण्याच्या स्पर्धेतून हा घाणेरडा आरोप कुकडे यांच्या माध्यमातून करण्यात आला आहे. संस्थेने परिश्रमातून नावलौकिक मिळविला आहे. मात्र आपल्या बदनामीसाठी स्पर्धकांकडून हा घाणेरडा आरोप केला जात असल्याचे ते म्हणाले.
बनावट निकालाची पोलिसांकडून चौकशी
या संदर्भात जिल्हा पोलीस अधीक्षकांशी संपर्क साधला असता, खोटा निकाल दाखवून फसवणूक करण्याप्रकरणी आयएनसाईट या संस्थेविरोधात तक्रार यापूर्वी आली होती, त्या संदर्भात चौकशी सुरु असल्याचे ते म्हणाले. आयएनसाईट या संस्थेतील विद्यार्थ्यांची तक्रार आपल्याकडे नाही. तसेच सुट्या असल्याने विद्यार्थीही बाहेर आहेत. विद्यार्थी परतताच त्यांचेही बयाण घेतले जाईल, असे ते म्हणाले. जनता करिअर लाँचरसंर्भातही काल तक्रार आली आहे. त्याचीही चौकशी केली जाईल, असे त्यांनी सांगितले.