रुग्णालयातील कंत्राटी कामगाराच्या कुटुंबांना आर्थिक मदत द्या

यंग चांदा ब्रिगेडची मागणी : जिल्हाधिकाऱ्यांना निवेदन

चंद्रपूर : कोरोनामुळे मृत्यू झालेल्या जिल्हा सामान्य रुग्णालयातील कंत्राटी कामगाराच्या कुटुंबीयांना आर्थिक मदत द्यावी, अशी मागणी यंग चांदा ब्रिगेडच्या वतीने करण्यात आली आहे. यासंदर्भात मागणीचे निवेदन त्यांच्या वतीने जिल्हाधिकारी अजय गुल्हाने यांना देण्यात आले आहे. यावेळी आदिवासी विभागाचे जिल्हाध्यक्ष जितेश कुळमेथे, यंग चांदा ब्रिगेडचे संघटक राम जंगम, राहुल मोहुर्ले आदींची उपस्थिती होती. जिल्हा सामान्य रुग्णालय येथे मागील १० वर्षांपासून कंत्राटी कामगार म्हणून वीज विभागात इलेक्ट्रिशियन म्हणून कार्यरत असलेल्या एका कामगाराचा कोरोनामुळे मृत्यू झाला होता. अशातच त्यांना कोरोनाची लागण झाली. मात्र उपचारादरम्यान त्यांचा मृत्यू झाला. घरात एकटाच कमवणारा असल्याने आता त्यांच्या परिवारावर उपासमारीची वेळ आली आहे. त्यातच मागील १० महिन्यांपासून कंत्राटी कामगारांचे वेतन थकीत आहे. त्यामुळे मोठे आर्थिक संकट कोसळले आहे. त्यामुळे मृतकाच्या मुलीला जिल्हा सामान्य रुग्णालयात नोकरीत सामावून घ्यावे, मागील १० महिन्यांपासून थकीत असलेले वेतन त्वरित द्यावे, मृत कंत्राटी कामगाराला कोरोना योद्धा घोषित करून त्याचा लाभ देण्यात यावा, आदी मागण्या करण्यात आल्या.