आता मी जाऊ कुठे...

पुरुषप्रधान संस्कृतीमध्ये अनेक दाम्पत्य वंशाचा दिवा म्हणून मुलगा जन्मास यावा, अशी आस करतात. उतरत्या वयात मुलगा आपली आधाराची काठी व्हावी, अशी अपेक्षा करतात.

मन हेलावून टाकणारी घटना : ८० वर्षीय वृद्ध मातेची आर्त हाक
राजकुमार चुनारकर खडसंगी
पुरुषप्रधान संस्कृतीमध्ये अनेक दाम्पत्य वंशाचा दिवा म्हणून मुलगा जन्मास यावा, अशी आस करतात. उतरत्या वयात मुलगा आपली आधाराची काठी व्हावी, अशी अपेक्षा करतात. मात्र एका निष्ठुर मुलाने आपल्या ८० वर्षीय वृद्ध मातेला घराबाहेर काढल्याचा संतापजनक प्रकार चिमूर पोलीस ठाण्यांतर्गत येणाऱ्या वाघेडा गावात घडला. त्यामुळे या मातेने थेट पोलीस ठाणे गाठून आपली कर्मकहानी कथन करीत, ‘आता या वयात मी जावू कुठे’ अशी आर्त हाक जनाबाई रामाजी शास्त्रकार या ८० वर्षीय मातेने पोलिसांसह समाजाला दिली आहे.
चिमूरपासून १५ किलोमीटर अंतरावर असलेल्या वाघेडा गावात रामाजी व जनाबाई शास्त्रकार यांचा परिवार राहत होता. त्यांच्या उदरातून दोन मुली व एक मुलगा असे अपत्य झाले. रामाजी व जनाबाईचा संसाराचा गाडा दोन एकर शेतीवर चालायचा. दरम्यान, जनाबाईच्या दोन मुलींचा विवाह झाल्याने त्या बाहेरगावी राहतात. जनाबाईचा पती १०-१२ वर्षांअगोदर जनाबाईला सोडून गेल्याने जनाबाईचा आधारच हरवला. मात्र काही दिवस एकुलता एक मुलगा आहे म्हणून त्या आशेवर जीवन जगत असताना आपला मुलगा आज उद्या साथ देईल, अशी आशा होती. मात्र मुलगा व सून या दोघांनी वृद्ध आईला आधार देण्याऐवजी घरातून हुसकावून लावले. त्यामुळे ती वृद्धा बाजुला झोपडीत जीवन व्यथित करीत आहे.
असे जीवनचक्र सुरू असतानाच दुसऱ्याच्या शेतीवर कामासाठी जात असतानाच ज्याला नऊ महिने उदरात वाढविले त्यानेच जन्मदात्या मातेच्या झोपडीला कुलूप लावून हाकलून दिले. त्यामुळे जनाबाईवर या वयात मोठे संकट कोसळले आहे. आता काय करावे, कुठे जावे, या प्रश्नाने अस्वस्थ झालेल्या त्या वृद्ध मातेने चिमूर पोलीस ठाणे गाठून आपली करूण कहाणी कथन केली.
८० वर्षीय वृद्ध मातेला आधार देण्याची वेळ असताना तिची सेवा तर दूर तिला घराबाहेर काढण्याचा संतापजनक प्रकार करणारा तिचा निर्दयी मुलगा सुधाकर रामजी शास्त्रकार (४०) व पत्नी उषा सुधाकर शास्त्रकार (३४) यांच्याविरूद्ध ज्येष्ठ नागरिक अधिनियम २००७ नुसार पालकाचे कल्याण हित व पोषण कायद्यांतर्गत कलम २४, २५ नुसार भादंवि ३२३ (३४) गुन्हा दाखल केला आहे. या घटनेने चिमूर तालुक्यासह जिल्ह्यात खळबळ उडाली आहे.
८० वर्षी वृद्ध मातेची हाक समाजातील सामाजिक संघटनांच्या कानापर्यंत पोहोचेल का, अशा निराधार मातांना आधार देतील काय, असा प्रश्न या घटनेने उपस्थित झाला आहे. समाजामध्ये वंशाचा दिवा म्हणून मुलाकडे पाहिल्या जाते आणि परिवारात मुलगा झाला तर मुलाचे स्वागत मोठ्या आनंदाने करण्यात येते. त्याला नऊ महिने उदरात वाढवण्यापासून त्याच्या पालनपोषणासाठी आईवडील अनेक दु:ख सहन करतात. मात्र मुलगा कर्ता झाला की त्याला आईवडिलांचा विसर पडत जातो. जन्मदात्यांना वाऱ्यावर सोडून दिल्या जाते. त्यामुळे वृद्ध आईवडिलांना नाईलाजास्तव वृद्धाश्रमाचा आधार घ्यावा लागतो. अशा वृद्ध आईवडिलांना आधार मिळावा म्हणून शासन अनेक योजना राबवित आहे. असे असतानाही अशा घटनावर आळा बसावा म्हणून शासनाने ज्येष्ठ नागरिक अधिनियम २००७ कायदा अंमलात आणला. तरीही समाजात अशा घटना घडत आहेत.
सामाजिक बांधिलकी म्हणून या वृद्ध मातेच्या पालन पोषणासाठी, पुनर्वसनासाठी समाज कल्याण अधिकारी तथा निराधार योजनेसाठी पोलीस विभागामार्फत पत्रव्यवहार करण्यात येणार आहे. तिला निवारा मिळवून देण्यासाठी योग्य कारवाई करण्यात येईल.
- संतोष ताले, ठाणेदार, चिमूर.