पालिकेत विविध दाखल्यांसाठी आता सेल्फ सर्व्हिस किऑस्क मशीन

: नागरिकांच्या वेळेची बचत होणार

भद्रावती : जन्म-मृत्यू प्रमाणपत्र व असेसमेंट प्रत तसेच इतरही दाखले प्राप्त करण्याकरिता नागरिकांना वाट पाहावी लागते. अर्जही करावा लागतो. यामध्ये त्यांचा वेळही जातो. या सर्व बाबींचा विचार करता नगर परिषद भद्रावतीतर्फे सेल्फ सर्व्हिस किऑस्क मशीन लावण्यात येणार असून, या मशीनद्वारे नागरिकांना अवघ्या पाच मिनिटांत विविध दाखले प्राप्त होणार आहे.

तसेच मशीनच्या वापराची पद्धत सोपी असल्याने कुठल्याही अडचणी शिवाय सदर मशीनमधून दाखले मिळण्यास मदत होणार आहे.

सेल्फ सर्व्हिस किऑस्क मशीनचा आकार व फंक्शन एटीएम मशीनसारखे आहे. जन्म-मृत्यू प्रमाणपत्र काढण्यासाठी तसेच इतरही प्रमाणपत्र काढण्यासाठी तसेच प्रति प्रमाणपत्र पन्नास रुपये इतके शुल्क मशीनमध्ये टाकल्यानंतर प्रमाणपत्र प्राप्त करता येईल. तसेच मशीनच्या स्क्रीनवर जन्मतारीख व ठिकाण याबाबत विचारणा होऊन त्यावर क्लिक केल्यास आपल्याला संबंधित प्रमाणपत्र प्राप्त होणार आहे .शुल्क फक्त नोटेद्वारेच अदा करता येणार आहे. यामध्ये नाण्यांचा वापर करता येणार नाही. तसेच असेसमेंट प्रत व इतर सेवा उपलब्ध करण्याची सुविधा लवकरच सुरू करण्यात येणार असल्याचे नगराध्यक्ष अनिल धानोरकर व मुख्याधिकारी सूर्यकांत पिदुरकर यांनी सांगितले.

येत्या आठवड्यात या मशीनचे उद्घाटन नगर परिषद भद्रावती परिसरात होणार असून, मशीन नागरिकांसाठी २४ तास सुरू राहणार आहे. यामुळे कर्मचाऱ्यांचाही व्याप कमी होणार असून, नागरिकांचा वेळ वाचणार आहे.