ताडोबातील जंगलापेक्षा शिवसेनेत अधिक वाघ

शिवसेना प्रमुख उद्धव ठाकरे व राज्याचे वित्त तथा वनमंत्री सुधीर मुनगंटीवार यांच्या उपस्थितीत शनिवारी नगराध्यक्ष सुवर्ण चषक

उद्धव ठाकरे : व्यासपीठावर रंगली राजकीय शेरेबाजी
सचिन सरपटवार /
विनायक येसेकर भद्रावती
शिवसेना प्रमुख उद्धव ठाकरे व राज्याचे वित्त तथा वनमंत्री सुधीर मुनगंटीवार यांच्या उपस्थितीत शनिवारी नगराध्यक्ष सुवर्ण चषक क्रीडा स्पर्धा तथा राज्यस्तरिय बॉक्सिंग स्पर्धेला प्रारंभ झाला. या स्पर्धेच्या उद्घाटनप्रसंगी व्यासपीठावर उद्धव ठाकरे आणि ना. सुधीर मुनगंटीवार या मित्र पक्षांच्या दोन नेत्यांच्या भाषणांदरम्यान रंगलेली राजकीय शेरेबाजी चर्चेचा विषय ठरली.
यावेळी व्यासपीठावर खासदार विनायक राऊत, आ.बाळू धानोरकर, बॉक्सिंग संघटनेचे अध्यक्ष जय कवळी, खासदार कृपाल तुमाने, माजी आमदार विश्वास नांदेकर, माजी मंत्री अशोक शिंदे, शिवसेना संपर्क प्रमुख विलास चावरी, शिवसेना जिल्हा प्रमुख, सतीश भिवगडे, भद्रावतीचे नगराध्यक्ष अनिल धानोरकर, उपाध्यक्ष प्रफुल्ल चटकी, मुख्याधिकारी विनोद जाधव, शिवसेना उपजिल्हा प्रमुख किशोर जोरगेवार, चंद्रकांत गुंडावार उपस्थित होते. स्पर्धेच्या उद्घाटनाचा कार्यक्रम स्थानिक नीळकंठ शिंदे महाविद्यालयाच्या प्रांगणावर पार पडला.
जगातील सर्वाधिक वाघ चंद्रपूर जिल्ह्यात आहेत आणि त्याचे संवर्धन करण्याचे काम मी हाती घेतले आहे, असे ना.सुधीर मुनगंटीवार यांनी आपल्या भाषणातून सांगितल्यानंतर उद्धव ठाकरे यांनी आपल्या भाषणातून ना.मुनगंटीवार यांना उद्देशून शिवसेना हा वाघांचा पक्ष आहे. चंद्रपूर जिल्ह्यातील वाघांच्या संख्येपेक्षा शिवसेनेत अधिक वाघ आहेत, त्यांचेही संवर्धन करा, असे आवाहन त्यांनी ना. मुनगंटीवारांना केले. माझा खेळाला विरोध नाही. पण खेळाच्या आडून जो देशाला विरोध करीत असेल त्याला माझा विरोध आहे. तो मग कोणत्याही धर्माचा असो. खेळाडूंसोबत दहशतवादी पाठविण्याला माझा विरोध आहे, असे ठाकरे म्हणाले. हिमाचल प्रदेशाच्या मुख्यमंत्र्यांनी पाकिस्तानच्या खेळाडूंना आपल्या प्रदेशात खेळण्यासाठी परवानगी दिली नाही. मी त्यांचे स्वागत करतो, असे सांगून ठाकरे म्हणाले, ममताताईंनी आगामी निवडणुकांना डोळ्यांसमोर ठेवून पाकला लाल गालिचाच्या घड्या घालून खेळण्यास परवानगी दिली. राजकारणात देशहिताच्या विरोधात काम करणाऱ्यांना जवळ केले जात असेल तर त्याला माझा विरोध आहे, असे त्यांनी ठणकावून सांगितले. यावेळी ना.सुधीर मुनगंटीवार म्हणाले, खेळामध्ये एक ऊर्जा असते. ही ऊर्जा या ठिकाणावरून आपण न्यावी व दीनदुबळ्यांची सेवा करावी, असे आवाहन त्यांनी यावेळी केले. याप्रसंगी आ. बाळू धानोरकर यांनीही मनोगत व्यक्त केले.