चंद्रपूर :मृत्यू कसा आणि केव्हा येईल, हे आपल्या हाती नसते. पण उभ्या आयुष्यात आनंदाची क्षणे आपल्या नशिबी येणार, याची वाट बघत असतानाच मृत्यू येणे यासारखे दुर्दैव ते कोणते. अशी हदयद्रावक घटना ब्रह्मपुरीच्या गोसीखुर्द कॅनलजवळ रविवारी घडली. एका चारचाकी वाहनाने मोटरसायकलला धडक दिली. यात एका युवकाचा मृत्यू झाला, तर एक गंभीर जखमी झाला.
आशिष मुळे (२५) रा. खरबी असे मृतकाचे नाव असून त्याचे फेब्रुवारी महिन्यात लग्न होऊ घातले होते. यात दुचाकीवरील समीर बागडे (२१) रा. माहेर हा गंभीर जखमी झाला आहे. आशिष मुळे यांचा गौण खनिज वाहण्याचा व्यवसाय होता. त्यांचे लग्न येत्या फेब्रुवारी महिन्यात होऊ घातले होते. घरी आनंदाचे वातावरण होते. लग्नाची तारीख जवळ आल्याने खरेदीला वेग आला होता. पण काळाने हे क्षण हिरावून घेतले व लग्नाच्या बेडीत अडकण्यापूर्वीच आशिषला रविवारी मृत्यूने कवटाळले.
आशिष व समीर हे आपल्या मोटरसायकलने ब्रह्मपुरीला येत असताना गोसेखुर्द कॅनलजवळ चारचाकी वाहनाने त्यांच्या दुचाकीला धडक दिली. यात आशिषचा जागीच मृत्यू झाला, तर समीर हा गंभीर जखमी झाला आहे. घटनेनंतर बोलेरोचा चालक वाहनासह पसार झाला. घटनेची माहिती मिळताच ब्रम्हपुरी पोलीस ठाण्यातील सहायक पोलीस निरीक्षक आशिष बोरकर, वाहतूक पोलीस राहुल लाखे, पोलीस अंमलदार संदेश देवगडे यांच्यासह अन्य पोलीस कर्मचारी घटनास्थळी दाखल झाले. त्यानंतर घटनेचा पंचनामा करण्यात आला. या घटनेचा पुढील तपास ब्रह्मपुरी पोलीस करीत आहेत.