मतदारांच्या पडताळणीनंतरच यादी तयार करावी

जिवती : फेब्रुवारी २०२१ मध्ये होणा-या नगर पंचायतीच्या निवडणुकीसाठी मतदाराचे नाव नोंदणी,पत्ता दुरूस्ती आदी कामे निवडणूक आयोगाकडून केली जात आहेत. जिवती नगर पंचायतीच्या मतदार यादीत बोगस मतदारांचा समावेश होण्याची शक्यता आहे. त्यामुळे मतदारांच्या पडताळणीनंतरच यादी तयार करण्याची मागणी नागरिकांच्या शिष्टमंडळाने तहसीलदारांकडे निवेदनातून केली.

जिवती शहरातील यादी भाग क्र.१८४, १८५,१८६ मध्ये बाहेर गावातील सुमारे २०० मतदारांची नोंद झाल्याची शंका आहे.त्यांचा जिवती शहराशी संबंध नाही. घर, शेतीवाडी व्यवसाय, बीपीएल यादीतील नाव, राशन कार्ड त्यांच्या मूळ गावलाच आहे. केवळ राजकीय लाभासाठी मतदार यादीत नावे समाविष्ट करण्यात आली. कुंभेझरी ग्राम पंचायतीची निवडणूक सहा महिन्यांपूर्वी झाली. या ग्रामपंचायतीमध्ये ४२ मतदारांनी मतदान केले. कुंभेझरी, चिखली (खुर्द) पाटागुडा, लेंडीगुडा, मरकलमेटा, केकेझरी, नारपठार, करणकोंडी, दमपूरमोहद, कोलंडी, गडचांदूर, नांदाफाटा, घुग्घुस, सांगवी, उमर, येथील नावे जिवती शहराच्या मतदार यादीत आहेत, असा आरोप महेश देवकते,कैलास राठोड,ममताजी जाधव,निशिकांत सोनकांबळे, मेहबूब शेख,मारोती बेल्लाळे,अमर राठोड,गजानन जुमणके, सुनीता वेट्टी, किरण चव्हाण आदिंनी निवेदनातून केला आहे.

बोगस नावे वगळावे

नि:पक्षपाती निवडणुकीसाठी मतदार यादीची चौकशी करून बोगस नावे वगळावे, तहसील कार्यालयात डिसेंबरची यादी अपडेट केली जात आहे. त्यातही काही बोगस नावे समाविष्ट असण्याची शक्यता आहे. त्यामुळे मतदार यादीचे प्रत्येक प्रभागामध्ये वास्तव्य करणा-या मतदारांची पडताळणी करावी. त्यानंतर अंतिम यादी तयार करावी, असेही निवेदनात नमुद केले आहे.