तिच्या व्यथांपुढे खाकीतील माणुसकी गहिवरली

येथील जोशना कुकडकर या तरुणीचे लग्न जुळले. घरात आईवडील आणि जोशना असे हे कुटुंब. आईवडील पोत्याच्या फाड्या विकून आपल्या कुटुंबाचा गाडा पुढे रेटत आहेत. लग्न जुळल्याने मुलीच्या लग्नाची चिंता दूर झाली. २५ फेब्रुवारी ही लग्नाची तारीखही ठरली. मात्र, रोजचे जेवणाचे वांदे असताना मुलीचे लग्न कसे करायचे, या विवंचनेत जोशनाचे आईवडील होते. ही बाब कुणीतरी सिंदेवाहीचे पोलीस निरीक्षक योगेश घारे यांना सांगितली. हे ऐकून तेही अस्वस्थ झाले.

ठळक मुद्दे‘त्या’ कुटुंबालाही मदत

राकेश बोरकुंडावार
लोकमत न्यूज नेटवर्क
सिंदेवाही : घरात अठराविश्वे दारिद्र्य. पोत्यांच्या फड्या करून विकणे हा कुटुंबाचा व्यवसाय. या व्यवसायात दोन वेळेचे जेवण मिळेल, याचीही शाश्वती नाही. अशातच मुलीचे लग्न जुळले. लग्नाची तारीख ठरली. घरी पैसाच नसल्यामुळे लग्न जुळूनही सहजीवनाचे स्वप्न रंगवू शकत नाही ही दैना. ही बाब कुणीतरी भला माणूस खाकीतल्या माणसाला सांगतो. हे ऐकून खाकीतील माणूस अस्वस्थ होतो आणि थेट त्या कुटुंबाचे घर गाठून मदतीचा हात पुढे करतो. हे बघून त्या कुटुंबाच्या आनंदाला पारावार उरत नाही. हे कोण्या चित्रपटातील कथानक नसून वास्तव आहे.
येथील जोशना कुकडकर या तरुणीचे लग्न जुळले. घरात आईवडील आणि जोशना असे हे कुटुंब. आईवडील पोत्याच्या फाड्या विकून आपल्या कुटुंबाचा गाडा पुढे रेटत आहेत. लग्न जुळल्याने मुलीच्या लग्नाची चिंता दूर झाली. २५ फेब्रुवारी ही लग्नाची तारीखही ठरली. मात्र, रोजचे जेवणाचे वांदे असताना मुलीचे लग्न कसे करायचे, या विवंचनेत जोशनाचे आईवडील होते. ही बाब कुणीतरी सिंदेवाहीचे पोलीस निरीक्षक योगेश घारे यांना सांगितली. हे ऐकून तेही अस्वस्थ झाले. त्यांनी सहकाऱ्यांसह थेट कुकडकर यांचे घर गाठून परिस्थिती बघितली.  त्यांनाही याची प्रचीती आली. या कुटुंबाला योजनांतून मदत मिळते काय याची चाचपणी केली. याशिवाय जोशनाचा विवाहासाठी लागणारी आवश्यक ती मदत पोलीस निरीक्षक घारे यांनी करून खाकीतही माणूस दडला असल्याचे दाखवून दिले. या मदतीने कुकुडकर कुटुंबीयांच्या चेहऱ्यावर आनंदाचे भाव  उमटले.

‘त्या’ कुटुंबालाही मदत
दोन दिवसांपूर्वी सिंदेवाही तालुक्यातील उटीमाल गावातील ममता कुंभारे (वय ६२) यांचे घर आगीत भस्मसात झाले. या महिलेसमोर जगण्याचा बिकट प्रश्न निर्माण झाला. पोलीस निरीक्षक योगेश घारे यांनी पोलीस अधीक्षक अरविंद साळवे व उपविभागीय पोलीस अधिकारी मिलिंद शिंदे यांच्या मार्गदर्शनात अन्नधान्य, कपडे व जीवनाश्यक वस्तूंसह आर्थिक मदतीचाही हातभार लावला