सुजान समाजनिर्मितीची शिक्षकांकडूनच आशा

समाज घडत असला तरी सुजान समाजनिर्मीतीची गरज आहे. या सोबतच संसरक्षम पिढी घडविण्याची गरज आहे.

सुधीर मुनगंटीवार : आदर्श शिक्षक पुरस्कार समारंभात आवाहन
चंद्रपूर : समाज घडत असला तरी सुजान समाजनिर्मीतीची गरज आहे. या सोबतच संसरक्षम पिढी घडविण्याची गरज आहे. हे काम शिक्षकच उत्तमपणे करू शकतात, त्यामुळे त्यांच्याकडून समाजाला मोठ्या आशा आहेत, असे प्रतिपादन वित्तमंत्री तथा जिल्ह्याचे पालकमंत्री सुधीर मुनगंटीवार यांनी केले.
जिल्हा परिषद कन्नमवार सभागृहात शिक्षकदिनाचे औचित्य साधून शनिवारी आदर्श शिक्षक पुरस्कार वितरण समारंभ पार पडला. यावेळी ते बोलत होते. जिल्हा परिषद अध्यक्ष संध्या गुरुनुले, आमदार नाना शामकुळे, मुख्य कार्यकारी अधिकारी डॉ. महेंद्र कल्याणकर, उपाध्यक्ष कल्पना बोरकर, शिक्षण सभापती देवराव भोंगळे, महिला व बालकल्याण सभापती सरिता कुडे, अप्पर मुख्य कार्यकारी अधिकारी अंकुश केदार, चंद्रपूर पंचायत समिती सभापती बंडू माकोडे, शिक्षणाधिकारी संजय डोर्लिकर प्रामुख्याने उपस्थित होते.
या समारंभात एकूण १५ शिक्षकांचा शाल-श्रीफळ-पुष्पगुच्छ आणि सन्मानचिन्ह देवून सपत्निक गौरव करण्यात आला. तसेच ग्रामीण भागातील प्राथमिक शाळा गुणवत्ता विकासामध्ये चिमूर तालुक्यातील कवडसी डाग प्रथम, ब्रम्हपुरी तालुक्यातील पारडगांव दुसरा तर नागभिड तालुक्यातील वासलामेंढा यांना तिसरा क्रमांक प्राप्त केल्यामुळे त्या शाळेच्या शिक्षकांचाही सत्कार यावेळी करण्यात आला.
यावेळी बोलताना पालकमंत्री म्हणाले, आपल्या पुरस्काराचे श्रेय्य आपल्या सहकाऱ्यांना देणाऱ्या आदर्श शिक्षकांचा वसा इतरांनी घेतला पाहिले. जिल्ह्यातील शिक्षकांनी चंद्रपूर नवचेतना मिशन राज्यात आदर्श ठरण्यासाठी कार्य करावे असे आवाहन करून ते म्हणाले, इतर जिल्ह्यातील नागरिकांनी चंद्रपूरच्या नवचेतना मिशनचे अनुकरण करायला हवेश अशा भरीव कार्याची अपेक्षा आहे.
यावेळी आमदार नाना शामकुळे, जिल्हा परिषद अध्यक्ष संध्या गुरुनुले, सभापती देवराव भोंगळे यांचीही भाषण झाली. (जिल्हा प्रतिनिधी)
यांचा झाला सत्कार
अनिल मारोतराव दागमवार (जि.प. हिंदी शाळा घुग्घुस), विलास नारायण कुळमेथे (जि.प. प्रा.शाळा मुरसा), किशोर काशिनाथ नागदेवते (जि.प.प्रा.शाळा, चिखलपार), खुशाल बाजीराव मदनकर (जि.प. प्रा.शाळा, पळसगाव खु.), राजेश्वर जगन सहारे (जि.प. प्रा.शाळा जुगनाळा), सुरेश श्यामराव राऊत (जि.प.ऊ.प्रा.शाळा रत्नापूर), मनिषा सूर्यकांत धोंड (जि.प. ऊ.प्रा.शाळा चांदापूर), देवेंद्र दयाळ रायपुरे, (जि.प.ऊ.प्रा.शाळा किसाननगर), राजेश जनार्दन वाग्दरकर (जि.प. प्रा.शाळा आंबधानोरा), किशोर बालाजी भोयर (जि.प.ऊ.प्रा.शाळा चेबेरडी), बाबूराव फिलबाजी पहानटे (जि.प. प्रा.शाळा, सास्ती), सुधाकर जगन्नाथ मडावी (जि.प. प्रा.शाळा, हिरापूर), शत्रुघ्न किसन गाऊत्रे (जि.प. प्रा.शाळा, कुंभेझरी), गजानन तुकाराम चिंचोलकर (जि.प. प्रा.शाळा, गिलबिली)