जी.एन.आर. तोडफोड प्रकरणातील सात आरोपींना अटक

दुर्गापूर :

स्थानिकांना नोकरीत सामावून घेण्याकरिता टाळाटाळ करणाऱ्या जी. एन. आर. कंपनीची तोडफोड करणाऱ्या सात मनसे कार्यकर्त्यांना पोलिसांनी अटक केली आहे.

त्यांना एक दिवसाची पोलीस कोठडी सुनावण्यात आली आहे. विशेष म्हणजे नागपूर परिक्षेत्राचे विशेष पोलीस महानिरीक्षकांनी घटनास्थळाची पाहणी केली.

भटाळी कोळसा खाणीत माती उत्खननाचे कार्य करीत असलेल्या जी. एन. आर. या खासगी कंपनीत बुधवारी मनसे कार्यकर्त्यांनी वाहनांची तोडफोड करून प्रचंड नुकसान केले. या गंभीर प्रकरणाची दखल घेत गुरुवारी नागपूर परिक्षेत्राचे विशेष पोलीस महानिरीक्षक चिरंजीव प्रसाद यांनी घटनास्थळाला भेट दिली. सदर प्रकरणात सामाविष्ट आरोपींचे दुर्गापूर पोलिसांनी अटकसत्र सुरू केले आहे. प्रशांत भोयर (३८), अजय धरणे (३७), चंदू गुरले (४२), यशकुमार सोनटक्के (४०) सर्व रा. दुर्गापुर, धीरज अग्रवाल (३२) रा.तुकूम, अंजय्या दागिनी (४६) रा. चंद्रपूर, नितेश रायपुरे (३१) रा. भटाळी अशा सात आरोपींना अटक केली आहे. त्यांना न्यायालयात हजर केले असता एक दिवसाची पोलीस कोठडी सुनावली आहे. याचा अधिक तपास दुर्गापुरचे ठाणेदार स्वप्निल धुळे करीत आहेत.