पतसंस्थांच्या माध्यमातून तीनशे व्यक्तींना रोजगार

नागभीड : नागभीड तालुक्यात उद्योगांची वानवा असली तरी सहकारी पतसंस्थांचे जाळे मोठ्या प्रमाणावर विणल्या गेले आहेत. सव्वा लाख लोकसंख्या असलेल्या या तालुक्यात आतापर्यंत १८ पतसंस्थांची स्थापना झाली आहे आणि या पतसंस्थांच्या माध्यमातून तालुक्यात सुमारे तीनशे व्यक्तींना रोजगारही प्राप्त झाला आहे.

नागभीड तालुका उद्योग विरहित आहे. या तालुक्यात मोठेच काय छोटेही उद्योग नाहीत. असे असले तरी या तालुक्यात सहकारी पतसंस्थांचे जाळे मोठ्या प्रमाणावर तयार होत आहेत. तालुक्याच्या सहकार क्षेत्रात पूर्वी नागभीड तालुक्याचे नाव अग्रक्रमावर होते. अनेक सहकारी दूध संकलन संस्था, भातगिरण्या, ग्रामोद्योग मंडळ, सहकारी संस्था सहकारी तत्त्वावर संचालित केल्या जायच्या. मात्र काळाच्या ओघात यातील काही संस्था तग धरू शकल्या नाहीत. काही संस्था मात्र अद्यापही तग धरून आहेत. या पार्श्वभूमीवर गेल्या २०-२५ वर्षात या सहकारी पतसंस्थांनी तालुक्यात आपली पाळेमुळे चांगलीच रोवली आहेत. या पतसंस्थांच्या माध्यमातून शेकडो तरूण रोजगाराला लागले आहेत.

बॉक्स

पहिली पतसंस्था १९९२ मध्ये आली

नागभीड तालुक्यात प्रथमतः स्वामी विवेकानंद या पतसंस्थेच्या माध्यमातून १९९२ मध्ये पतसंस्थांची पायाभरणी झाली. आणि तेथून पतसंस्थांचा प्रवाह या तालुक्यात सुरू झाला. त्यानंतर एकामागून एक अशा पतसंस्था स्थापन झाल्या. अगोदर सर्वसमाशक असलेल्या या पतसंस्था नंतर समाजाच्या व जातीच्या नावावरही स्थापन झाल्या. या पतसंस्थांचा व्यावहारिक हिशेब काढला तर यातील अनेक पतसंस्था नफ्यापेक्षा तोट्यातच असाव्यात, अशी चर्चा वर्तुळात आहे. यात आणखी उल्लेखनीय बाब अशी की व्यवहार मोठे असलेल्या बाहेरच्या मोठ्या पतसंस्थांनी येथे आपल्या शाखाही सुरू केल्या आहेत. तर येथील एका पतसंस्थेने तालुक्यात इतर ठिकाणी शाखा सुरू केल्या आहेत.

बॉक्स

नागभीड शहरात आठ पतसंस्था

आज नागभीडचा विचार केला तर नागभीडची लोकसंख्या १५ हजाराच्या आसपास आहे. १५ हजार लोकसंख्या असलेल्या या नागभीडमध्ये आठ पतसंस्था आहेत. शहराबाहेरील एका पतसंस्थेने येथे आपली शाखा सुरू केली आहे. तालुक्याचा विचार केला तर तालुक्याची लोकसंख्या सव्वा लाखाच्या जवळपास आहे. सव्वा लाख लोकसंख्या असलेल्या या तालुक्यात १८ पतसंस्था पतसंस्था कार्यरत आहेत.