चांदा ते बांदा विकासासाठी समिती गठित

चंद्रपूर व सिंधुदुर्ग जिल्ह्यामध्ये साधन संपत्तीचे परिणामकारक नियोजन करुन सर्वंकष विकास करण्याच्या दृष्टीने चंद्रपूर ...

अर्थराज्यमंत्री समितीचे अध्यक्ष : तीन महिन्यात समिती देणार अहवाल
चंद्रपूर : चंद्रपूर व सिंधुदुर्ग जिल्ह्यामध्ये साधन संपत्तीचे परिणामकारक नियोजन करुन सर्वंकष विकास करण्याच्या दृष्टीने चंद्रपूर व सिंधुदुर्ग जिल्ह्यासाठी रिसोर्स बेस्ड डेव्हलपमेंटच्या दृष्टीने आराखडा तयार करण्यासाठी अर्थराज्यमंत्री दीपक केसरकर यांच्या अध्यक्षतेखाली उच्चस्तरीय समिती स्थापन करण्यात आली आहे. नियोजन विभागाने यासंबंधीचा शासन आदेश गुरूवारी २० आॅगस्टला निर्गमित केला.
महाराष्ट्राच्या दोन टोकावरील चंद्रपूर व सिंधुदुर्ग या खनिज व नैसर्गिक संपत्तीचे वरदान लाभलेल्या जिल्ह्यातील नैसर्गिक साधन संपत्तीचा इष्टतम वापर व्हावा, यासाठी सधन नियोजन व अंमलबजावणीचा विशेष कार्यक्रम राबविल्या जाईल, असे आश्वासन अर्थमंत्री सुधीर मुनगंटीवार यांनी अर्थसंकल्पीय भाषणात दिले होते. त्यानुषंगाने या दोन्ही जिल्हयातील वन संपत्ती, पर्यटन, मत्स्य उत्पादन, फलोत्पादन इत्यादी साधन संपत्तीवर आधारित उद्योग, रोजगार, कृषी, मत्स्य संवर्धन, पशु संवर्धन, प्रक्रिया उद्योग, पर्यटन, वनउपज आधारित उद्योग, महिला बचत गट सक्षमीकरण, कौशल्यवृध्दी कार्यक्रमातंर्गत रोजगार निर्मिती अशा जिल्ह्यातील सर्व योजना व कार्यक्रमांची सांगड घालून जिल्ह्याच्या विकासाचे मॉडेल तयार करण्याचे काम ही समिती करणार आहे.
पर्यटन, फलोत्पादन, जलसंधारणाचे विविध उपक्रम राबविणे, उद्योग व खनिज, ग्रामविकास व दारिद्रय निर्मूलन, कृषी, मत्स्य उद्योग व संलग्न, वन व वनोत्पादन पदार्थ या विकास क्षेत्रांसाठी यथार्थदर्शी योजना तयार करण्याची जबाबदारी या समितीवर असणार आहे. या समितीत अप्पर मुख्य सचिव परिवहन, अपर मुख्य सचिव कृषी, अपर मुख्य सचिव वित्त, अप्पर मुख्य सचिव नियोजन, प्रधान सचिव पर्यावरण, प्रधान सचिव ग्रामविकास, सचिव उद्योग, सचिव वने, सचिव जलसंधारण व रोहयो, सचिव रस्ते, मुख्य कार्यकारी अधिकारी मेरीटाईम बोर्ड, संचालक महाराष्ट्र रिमोट सेसिंग सेंटर नागपूर, जिल्हाधिकारी चंद्रपूर व जिल्हाधिकारी सिंधुदुर्ग हे सदस्य राहणार असून राष्ट्रीय ग्रामीण जीवनोन्नती अभियानाचे मुख्य कार्यकारी अधिकारी समितीचे सदस्य सचिव राहतील. बीएआयएफचे अध्यक्ष जी.जी. सोहनी, जैव विविधता मंडळाचे माजी अध्यक्ष तथा भारतीय विद्यापीठ जैव विविधता विभाग प्रमुख डॉ. भरुचा, विज्ञान व तंत्रज्ञान पार्क केंद्र शासन प्रमुख श्रीजगदाळे, बुलडाणा येथील नासाचे माजी शास्त्रज्ञ बाळासाहेब दराडे यांचा समितीत विशेष निमंत्रित म्हणून समावेश आहे. (प्रतिनिधी)