चिमूर - ब्रम्हपुरीत राष्ट्रवादी काँग्रेसला नवसंजिवनी देण्याचा प्रयत्न

घनश्याम नवघडे

नागभीड : जिल्हा परिषद, पंचायत समित्या व नगर परिषदांची निवडणूक वर्षभरावर आली असताना राष्ट्रवादी काँग्रेसच्या राज्य नेतृत्त्वाने चंद्रपूर जिल्ह्यातील चिमूर व ब्रम्हपुरी विधानसभा क्षेत्रात जबरदस्त फिल्डिंग लावणे सुरू केले आहे. यात या दोन्ही क्षेत्रातील दोन मोठे नेते गळाला लागले असल्याचेही बोलले जात आहे.

राष्ट्रवादी काँग्रेसच्या स्थापनेला आता २० वर्षांपेक्षा अधिक कालावधी होत असला तरी या दोन्ही क्षेत्रात राष्ट्रवादी काँग्रेसची अद्याप पाळेमुळे रूजली नाहीत. या दोन्ही क्षेत्रात राष्ट्रवादी काँग्रेस 'नाही'च्या बरोबरीतच आहे. याची जाणीव राष्ट्रवादी काँग्रेसच्या नेतृत्त्वाला आहे. ही उणीव भरून काढण्यासाठी राष्ट्रवादी काँग्रेस प्रयत्नशील आहे. म्हणूनच जयंत पाटील यांच्यासारख्या नेत्याला राष्ट्रवादी काँग्रेसने कामाला लावले असावे, अशीही राजकीय वर्तुळात चर्चा सुरू झाली आहे.

याचाच एक भाग म्हणून राज्याचे पाटबंधारे मंत्री जयंत पाटील यांनी गुरुवारी आणि शुक्रवारी या दोन्ही विधानसभा क्षेत्राचा दौरा केला. या दौऱ्यात पाटील यांनी ब्रम्हपुरीतील एक मोठे नेते यांच्याशी बरीच खलबते केली असल्याचे बोलले जात आहे. या नेत्याने ब्रम्हपुरीचे बरीच वर्ष नेतृत्व केले असून, एकदा अपक्ष म्हणून विधानसभेची निवडणूकही लढली आहे. एवढेच नाही तर या नेत्याचे राष्ट्रवादी काँग्रेसच्या एका केंद्रीय नेत्याशी कौटुंबीक संबंधही आहेत.

जयंत पाटील यांनी चिमूर विधानसभा क्षेत्रातून फार थोड्या मतांनी पराभूत झालेल्या एका नेत्याची घेतलेली अशीच एक भेट राजकीय 'तडका' ठरला आहे. चिमूर विधानसभा क्षेत्रात सध्या नवनवीन राजकीय समीकरणे उदयास येत आहेत. या समीकरणांनी हा नेता विचलित असल्याची चर्चा राजकीय वर्तुळात आहे. याची जाणीव राष्ट्रवादीच्या नेतत्त्वाला झाली असावी. म्हणूनच जयंत पाटील नागभीड येथे आले असताना या नेत्याला स्वतःच्या गाडीत बसवून चंद्रपूरपर्यंत घेऊन गेले. एवढेच नाही तर दुसऱ्या दिवशी या नेत्याच्या घरी तासभर खलबतेही केली.