दीक्षाभूमीवर धम्मचक्र अनुप्रवर्तन समारंभाला सुरुवात

येथील पवित्र दीक्षाभूमीवर आयोजित धम्मचक्र अनुप्रवर्तन समारंभाला आजपासून सुरुवात झाली. मात्र, आज विधानसभा निवडणूकीसाठी मतदान असल्याने दरवर्षीसारखी गर्दी दिसून आली नाही.

चंद्रपूर : येथील पवित्र दीक्षाभूमीवर आयोजित धम्मचक्र अनुप्रवर्तन समारंभाला आजपासून सुरुवात झाली. मात्र, आज विधानसभा निवडणूकीसाठी मतदान असल्याने दरवर्षीसारखी गर्दी दिसून आली नाही. सायंकाळी साडेसहाच्या सुमारास शहरातून वाहनासह मिरवणूक काढण्यात आली. या मिरवणूकीत अनुयायींचा मोठ्या संख्येने सहभाग होता.
दोन दिवस चालणाऱ्या सोहळ्यासाठी देशभरातील भिक्खुगण, बौद्ध, आंबेडकरी विचारवंत, विविध समीक्षक, साहित्यिक, देश-विदेशातील अभ्यासक येथे आज दाखल झाले. विचारवंताचे उद्या गुरुवारला प्रबोधन होणार आहे. समारंभस्थळी विश्वरत्न डॉ. बाबासाहेब आंबेडकरांच्या पवित्र अस्थिचे जतन केलेला अस्थिकलश दर्शनार्थ ठेवण्यात आले आहे. बुद्धधम्म प्रचारकांकडून धम्ममय आनंदाची रुजवण, जगविख्यात बुद्धधम्म प्रचारकांकडून धम्म श्रवण, धम्मसंबंधित उपयुक्त वस्तुंचे स्टॉल, बोधीवृक्षाचे दर्शन हे या समारंभाचे खास वैशिष्ट आहे. थायलंड येथून दीक्षाभूमीवरील बुद्ध विहारात १६.५ फुट उंच अभय मुद्रेतील बुद्धरुपाचे दर्शन तसेच श्रद्धेय भिक्खू संघाकडून धम्म श्रेवणद्वारा धम्ममय आनंदाची रुजवण करता येणार असून जगविख्यात बुद्धधम्म प्रचारकांकडून धम्म श्रवण द्वारा मानसवृद्धी, धम्मसंबंधीत उपयुक्त वस्तुचे स्टॉल, दीक्षाभूमीवरील रोपणातून बहरलेल्या बोधिवृक्षाचे दर्शन बांधवांना घेता येत आहे. संपूर्ण दीक्षाभूमी परिसरात रोषणाई करण्यात आली असून दीक्षाभूमीस्थळी तथागत गौतम बुद्ध व प.पू. डॉ. बाबासाहेब आंबेडकर यांचे भव्य छायाचित्र उभारण्यात आले आहे. उद्या १६ आॅक्टोबरला सकाळी १० वाजता अस्थिकलश मिरवणूक निघणार आहे. (स्थानिक प्रतिनिधी)