घोसरी : येथील ग्रा. पं. सदस्याने एका साथीदारासह वेळवा येथील विलगीकरण कक्ष परिसरात गुरुवारी रात्री धिंगाणा घालून कर्तव्यावर असलेल्या होमगार्डला मारहाण व महिला सरपंचास अश्लील शिवीगाळ केली. तक्रारीवरून पोलिसांनी गुन्हा दाखल करून एकास अटक केली, तर ग्रामपंचायत सदस्य रूपेश निमसरकार फरार आहे.
जिल्हा परिषद प्राथमिक शाळेतील विलगीकरण क्षेत्रात १३ मे रोजी रात्री ८ वाजताच्या दरम्यान गाव समिती अध्यक्ष तथा सरपंच उपस्थित असताना ग्रामपंचायत सदस्य रूपेश निमसरकार व रोहित राकेश जाधव हे तिथे आले व सरपंच सीमा निमसरकारसोबत हुज्जत घालून शिवीगाळ केली. हे प्रकार घडत असताना कर्तव्यावर असलेले होमगार्ड देवराव दुधबळे हे पोलिसांना फोनवरून माहिती देत असताना आरोपींनी त्यांना मारहाण करून जिवे मारण्याची धमकी दिली. काही वेळात पोलीस घटनास्थळी दाखल झाले. आरोपी रोहित जाधव यास ताब्यात घेतले. परंतु ग्रामपंचायत सदस्य रूपेश निमसरकार याने पलायन केले.
सरपंच सीमा निमसरकार व होमगार्डने दिलेल्या वेगवेगळ्या लेखी तक्रारीवरून आरोपीविरुद्ध कलम ३५३, ३५४, ३३२, ५०४, ५०६ भादंवि व आपत्ती व्यवस्थापन कायदा ५१ (ब) अन्वये गुन्हा दाखल करण्यात आला आहे. पुढील तपास ठाणेदार धर्मेंद्र जोशी यांच्या मार्गदर्शनाखाली पोलीस उपनिरीक्षक दादाजी ओल्लालवार करीत आहेत.