घराघरात संवाद तुटणार नाही याची दक्षता घ्या

राज्यात पोलीस दलाच्या सायबर शाखेतर्फे व माहिती व जनसंपर्क महासंचालनालयाच्या सहभागात सर्व जिल्ह्यांमध्ये सायबर सेफ वुमेन ही मोहीम राबविण्यात आली. चंद्रपूर जिल्ह्यामध्ये जिल्हा पोलीस अधीक्षक डॉ. महेश्वर रेड्डी यांच्या पुढाकारातून तीन ठिकाणी एकाच दिवशी सायबर सेफ वुमेन ही मोहीम राबविण्यात आली.

ठळक मुद्देसंडे अँकर । किशोर जोरगेवार, सायबर सेफ वुमेन कार्यशाळा उत्साहात

लोकमत न्यूज नेटवर्क
चंद्रपूर : सार्वजनिक जीवनात वावरताना दररोज एखादी तरी तक्रार ही सोशल माध्यमांवर फसवणूक झाल्याची असते. अनेक तक्रारी पोलिसांपर्यंत येत नाही. त्यामुळे याची व्याप्ती मोठया प्रमाणात असून या आभासी जगामध्ये वावरताना घराघरात संवाद तुटणार नाही, याची काळजी घ्या, असे आवाहन आमदार किशोर जोरगेवार यांनी शुक्रवारी केले.
राज्यात पोलीस दलाच्या सायबर शाखेतर्फे व माहिती व जनसंपर्क महासंचालनालयाच्या सहभागात सर्व जिल्ह्यांमध्ये सायबर सेफ वुमेन ही मोहीम राबविण्यात आली. चंद्रपूर जिल्ह्यामध्ये जिल्हा पोलीस अधीक्षक डॉ. महेश्वर रेड्डी यांच्या पुढाकारातून तीन ठिकाणी एकाच दिवशी सायबर सेफ वुमेन ही मोहीम राबविण्यात आली. या माध्यमातून मोठया प्रमाणात मुली व महिलांना सायबर गुन्ह्यांच्या संदर्भात प्रबोधन करण्यात आले.
जिल्हाधिकारी कार्यालयातील नियोजन भवनात विशेष कार्यक्रमाचे आयोजन करण्यात आले होते. आमदार किशोर जोरगेवार, जिल्हा पोलीस अधीक्षक डॉ. महेश्वर रेड्डी, अपर पोलीस अधीक्षक प्रशांत खैरे यांची उपस्थिती होती. या कार्यक्रमांमध्ये विविध संघटनांचे प्रतिनिधी सहभागी झाले होते.
जिल्हा पोलीस अधीक्षक डॉ. महेश्वर रेड्डी यांनी यावेळी उपस्थिताशी संवाद साधताना पावर पॉइंट प्रेझेंटेशनद्वारे इंटरनेट क्षेत्रांमधल्या होणाऱ्या फसवणुकीचा आढावा सादर केला. इंटरनेटच्या माध्यमातून आपला खासगीपणा कशा पद्धतीने संपुष्टात येऊ शकतो व त्यासंदर्भात जिल्हास्तरावर झालेल्या अनेक गुन्ह्यांची माहितीदेखील त्यांनी दिली. सायबर गुन्हे कसे होतात. सायबर गुन्ह्याचे प्रकार काय असतात. घटस्फोटिता, एकटया महिला, मुलींना विशेषत: कशा पद्धतीने फसविले जाते, ज्येष्ठ नागरिकांना कशा पद्धतीने आर्थिक व्यवहारात फसविले जाते, याची उदाहरणे दिली. अपर पोलीस अधीक्षक प्रशांत खैरे, साहायक पोलीस निरीक्षक प्रभावती एकुरके यांनीही यावेळी मार्गदर्शन केले. कार्यक्रमाचे संचालन पोलीस निरीक्षक तुषार चव्हाण यांनी केले.
कार्यक्रमाला जेसीआयचे अध्यक्ष शीतल पडगीलवार, जेसीआय गरीमाच्या अध्यक्ष शीतल लोहिया, जेसीआय इलाईटच्या अध्यक्ष राधिका सारडा, महर्षी विद्या मंदिराचे संचालक गिरीष चांडक, सर्व समान बहु. महिला संस्था अध्यक्ष डॉ. भारती दुधानी, फ्रेंड्स चॅरिटी ग्रुपचे अध्यक्ष सरिता मालू, सोनम मडावी, मंदा पडवेकर, मुस्लिम एज्युकेशन संघटनाच्या शाहीन शेख, डॉ. सुनिता मुंधडा, भरत बजाज, प्रतिक सारडा उपस्थित होते.