चंद्रपूर : अहमदाबादवरून विजयवाड़ा येथे नवजात बालकाची तस्करी करणाऱ्या जोडप्याला पोलिसांनी रविवारी बल्लारपूर रेल्वे स्थानकावर अटक केली. मात्र, सुरुवातीला आराेपींनी खोटी माहिती देऊन पोलिसांची दिशाभूल करण्याचा प्रयत्न केला. त्यानंतर संशय वाढल्याने पोलिसांनी त्यांच्याकडील मोबाईल हिसकावून तपासणी केली असता व्हाॅट्स ॲप चॅटिंगमध्ये त्या बाळाच्या अपहरणाचा तपशील आढळला आणि त्या नकली जन्मदात्यांचे बिंग फुटले. रेल्वे पोलिस व बाल संरक्षण कक्षाच्या सतर्कतेमुळे बाळ सुरक्षित असल्याची माहिती प्रशासनाने दिली.
बल्लारपूर आरपीएफ व जीआरपी यांना बाळ अपहरणाची गुप्त माहिती मिळाल्यानंतर त्यांनी नवजीवन एक्सप्रेसच्या (गाडी क्र. १२६५५) डब्बा क्र. एस-३ मध्ये आरपीएफचे कर्मचारी व रेल्वे चाईल्ड लाईन कर्मचायांनी तपासणी केली. दरम्यान, बर्थ क्रमांक २३ वर एक जोडपे संशयास्पद स्थितीत आढळले. त्यांच्याकडे दोन ते तीन महिन्यांचे बालक आढळले. बालकाबाबत विचारले असता उडवाउडवीची उत्तरे दिली. ते बाळ स्वतःचे असल्याचे सांगितले. परंतु संशय वाढला. त्यामुळे जोडप्याला बल्लारपूर रेल्वे स्टेशनला उतरवून पोलिस ठाण्यात आणले.
दोन महिन्यांच्या तान्हुल्याचे अपहरण; बल्लारशाह रेल्वे स्थानकावर बंटी-बबलीला अटक
विचारपूस केली असता पुरुषाने स्वत:चे नाव चंद्रकांत मोहन पटेल ( ४० वर्षे, पत्ता- इंदिरानगर, संगम सोसायटी, राणी सती मार्ग, मलाड ईस्ट, मुंबई) तर महिलेने आपले नाव द्रौपदी राजा मेश्राम (४० वर्षे, पत्ता-आयबीएम रोड, धम्म नगर, गिट्टीखदान, काटोल रोड, नागपूर) असे सांगितले. त्यांच्यासोबत असलेले बाळ त्यांचे नसल्याची कबुली दिली. बालकाबाबत पुन्हा विचारले असता खरी उत्तरे न दिल्याने त्यांच्याजवळचा मोबाईल हिसकावून तपासण्यात आला. त्यातील रेकॉर्ड व व्हाॅट्स ॲप चॅटिंगमुळे बाळाला अहमदाबादवरून तस्करी करून विजयवाडा येथे नेण्यात येत उघडकीस आले. ही कारवाई पोलिस उपअधीक्षक राधिका फडके, आरपीएफ उपनिरीक्षक प्रवीण महाजन, आरती यादव, प्रवीण गाढवे, पोलीस उपनिरीक्षक ए. एस. अली, डी. गौतम, अखिलेश चौधरी, बालकल्याण समिती, महिला व बालविकास अधिकारी दीपक बानाईत, जिल्हा बाल संरक्षण अधिकारी अजय साखकर, पोलिस निरीक्षक के.एन.रॉय आदींनी केली.
तो पाच हजार रूपये देणारा कोण ?
पोलिसांनी आरोपी महिलेची अधिक विचारपूस केली असता संशयित व्यक्तीने बाळाला सोबत घेऊन जाण्याचे पाच हजार रुपये दिले होते, असे तिने सांगितले. सोबत असलेल्या संशयित व्यक्तीला विचारले असता अहमदाबाद स्टेशनवर दोन व्यक्तीने बाळाला विजयवाडा येथे पोहोचून देण्याची जबाबदारी दिली होती, अशी कबुली दिली. त्यामुळे प्रकरणाबाबत दोन्ही व्यक्तींनी बरीच माहिती लपविण्याचा प्रयत्न केल्याचे निदर्शनास आले.
सतर्कतेमुळे बाळ सुरक्षित
रेल्वे चाईल्डलाईन यांच्या सहकार्याने बालकाची शासकीय रुग्णालय, बल्लारपूर येथे वैद्यकीय तपासणी झाल्यानंतर रेल्वे चाइल्ड लाईन समन्वयक भास्कर ठाकूर, समुपदेशिका त्रिवेणी हाडके, सुरेंद्र धोंडरे, अचल कांबळे व जीआरपी कर्मचारी यांनी त्या बाळाला किलबिल दत्तक योजना व पूर्व प्राथमिक बालगृह चंद्रपूर येथे रात्री दाखल केले. बाळ सुरक्षित आहे. सोमवारी बाळाला बालकल्याण समिती समोर उपस्थित करून तात्पुरता दाखल आदेश देण्यात आला. ही माहिती बाल संरक्षण अधिकारी अजय साखरकर यांनी जिल्हाधिकारी विनय गौडा व पोलिस विभागाला दिली.