चंद्रपूर : नोटबुकाच्या शेवटच्या पानावर ‘स्वारी’ लिहून बारावीच्या विद्यार्थिनीने परीक्षेच्या पूर्वसंध्येलाच आपल्या आजोबाच्या घरी पंख्याला गळफास घेऊन आत्महत्या केल्याची खळबळजनक घटना मंगळवारी (दि.२०) सायंकाळी ७ वाजताच्या सुमारास सुमित्रानगर तुकुम येथे उघडकीस आली. अनिशा खरतड (१९) असे आत्महत्या करणाऱ्या विद्यार्थिनीचे नाव आहे. अनिशाचे वडील चंद्रपूर पोलिस अधीक्षक कार्यालयात वायरलेस विभागात पोलिस उपनिरीक्षक पदावर कार्यरत आहेत.
अनिशा आपल्या आई-वडील बहीण व भावासह जय दुर्गा अपार्टमेंटमध्ये वास्तव्यास होती तर लगतच तिचे आजी-आजोबा वास्तव्यास आहेत. सद्य:स्थितीत ते नागपूरला गेले आहेत. त्यामुळे त्याचा फ्लॅट रिकामा आहे. २१ फेब्रुवारीपासून बारावीची परीक्षा असल्याने ती आजोबांच्या फ्लॅटमध्ये अभ्यास करायला जायची. अनिशा मागील वर्षीच बारावीची परीक्षा उत्तीर्ण झाली होती. मात्र, गणितामध्ये अधिक गुण मिळावे यासाठी ती पुनर्परीक्षा देणार होती. मंगळवारी ती दररोजसारखी अभ्यास करायला आजोबांच्या फ्लॅटमध्ये गेली होती. मात्र, बराच वेळ झाल्यानंतरही ती परत आली नाही. त्यामुळे तिचे आई-वडील त्याठिकाणी गेले. त्यांना दरवाजा उघडाच आला. त्यांनी रुममध्ये जाऊन बघितल्याबरोबर अनिशा पंख्याला गळफास घेतलेल्या अवस्थेत दिसून आली. हे दृश्य बघून दोघांनीही मोठा हंबरडा फोडला. याबाबतची माहिती दुर्गापूर पोलिस स्टेशनला देण्यात आली.
दरम्यान, अप्पर पोलिस अधीक्षक रिना जनबंधू, उपविभागीय पोलिस अधिकारी सुधाकर यादव, दुर्गापूरच्या पोलिस निरीक्षक लता वाडीवे आपल्या चमूसह दाखल झाले. यावेळी त्यांनी घटनास्थळाची पाहणी करताना नोटबुकच्या शेवटच्या पानावर ‘स्वारी’ लिहिल्याचे दिसून आले. पोलिसांनी घटनेचा पंचनामा करून मृतदेह शवविच्छेदनासाठी जिल्हा सामान्य रुग्णालयात पाठवला. पुढील तपास दुर्गापूर पोलिस करत आहेत.