कोरोना प्रतिबंधात्मक उपाययोजनेसाठी प्रशासन अलर्ट

कोरोनाचा फैलाव होण्याची जास्त शक्यता असणारे सुपरस्प्रेडर वृत्तपत्र विक्रेते, भाजी विक्रेते, दूधवाले, किराणा दुकानदार, केश कर्तनालय, बॅण्डवाले, कॅटरिंग कामगार, रोजंदारी मजूर अशा विविध गटात विभागून तपासणी करण्याचे निर्देश जिल्हाधिकारी गुल्हाने यांनी आरोग्य यंत्रणेला दिले. शासकीय रुग्णालयातील ऑक्सिजन बेड, औषधसाठा व मनुष्यबळ योग्य प्रमाणात उपलब्ध ठेवण्याचे निर्देश दिले. प्रतिकारशक्ती जाणून घेण्यासाठी पाच हजार नागरिकांचे सिरो सर्वेक्षण केले जाणार आहे. यावेळी जिल्हा परिषदेचे मुख्य कार्यकारी अधिकारी राहुल कर्डिले, अपर जिल्हाधिकारी विद्युत वरखेडकर, जिल्हा आरोग्य अधिकारी डॉ. राजकुमार गहलोत, शासकीय वैद्यकीय महाविद्यालयाचे डॉ. राजेंद्र सुरपाम, जिल्हा लसीकरण अधिकारी डॉ. संदीप गेडाम, डॉ. सुधीर मेश्राम, डॉ. साठे आदी प्रामुख्याने उपस्थित होते, तर व्हिडिओ कॉन्फरन्समध्ये जिल्हा परिषद अध्यक्ष संध्या गुरनुले, महापौर राखी कांचनवार, विविध राजकीय पक्षांचे पदाधिकारी व व्यापारी संघटनेचे प्रतिनिधी सहभागी झाले होते.

१६ रुग्णांची नव्याने भर; एकाचा मृत्यू

जिल्ह्यात २४ तासात १२ जणांनी कोरोनावर मात केली, तर १६ बाधितांची नव्याने भर पडली. एका बाधिताचा मृत्यू झाला आहे. आतापर्यंत एकूण बाधितांची संख्या २३ हजार २९४वर पोहोचली आहे. बरे झालेल्यांची संख्या २२ हजार ७९१ झाली आहे. सध्या १०८ बाधितांवर उपचार सुरू आहेत. आतापर्यंत दोन लाख आठ हजार २७५ नमुन्यांची तपासणी झाली. त्यापैकी एक लाख ८३ हजार १७२ नमुने निगेटिव्ह आले आहेत. आज मृत झालेल्यामध्ये भद्रावती येथील युवकाचा समावेश आहे. जिल्ह्यात आतापर्यंत ३९५ बाधितांचे मृत्यू झाले.