बल्लारपूर (चंद्रपूर) : शहरातील टेकडी विभागात एका मित्राची त्याच्याच चार मित्रांनी मिळून दगडाने ठेचून हत्या केल्याची खळबळजनक घटना गुरुवारी सकाळी उघडकीस आली. या घटनेत चारही आरोपींना बल्लारपूर पोलिसांनी अटक केली आहे.
दीपक रामआसरे कैथवास (२८) रा. रवींद्र वॉर्ड, बल्लारपूर असे मृतकाचे नाव आहे. सविस्तर वृत्त असे आहे की, रवींद्र वॉर्डातील दीपक रामआसरे कैथवास व मौलाना आझाद वॉर्डातील त्याचे मित्र अर्जुन राजू कैथवास (२८), प्रथम शंकर पाटील (२५), गौरव राजू लिडवे, अमन कैथवास (२०) रा. बुद्धनगर वार्ड यांच्यासोबत एक वर्षाआधी भांडण झाले होते. तेव्हापासून दीपकचे आरोपी मित्रांशी पटत नव्हते. बुधवार रात्री ७.३० वाजता भुऱ्या सिंगलवार याच्यासोबत अर्जुन कैथवास याचे संविधान चौकात भांडण झाले होते. म्हणून दीपक हा दोघांना समजवायला तिथे गेला असता त्यांच्यात वाद वाढला. हा वाद ठाण्यात गेला. तेव्हा पोलिसांनी त्यांच्यावर गुन्हे दाखल करून सोडून दिले.
चार तासांनंतर दीपक एकटा घरी जात असताना सर्व मित्रांनी त्याला गाठून दगड व धारदार वस्तूने डोक्यावर वार करून ठार मारले. घटनेची तक्रार रवींद्र वॉर्डात राहणारे फिर्यादी प्रकाश रामआसरे कैथवास यांनी गुरुवारी सकाळी करताच सपोनि शैलेंद्र ठाकरे यांनी तपास हाती घेऊन चारही आरोपींना भादंविच्या कलम ३०२, ३४ प्रमाणे गुन्हा दाखल करून अटक केली. पुढील तपास बल्लारपूर पोलिस करीत आहेत.