मोटारसायकल अपघातात जळगावचे दोन तरुण ठार

रिधोरानजीक घटना ; खड्डय़ांमुळे अपघात!

जळगाव जामोद (जि. बुलडाणा) : जळगाव जामोद येथील दोन तरूण रिधोरानजीक पेट्रोलपंपासमोर झालेल्या ट्रक मोटारसायकल अपघातात ठार झाले. त्यामुळे जळगाव नगरावर शोककळा पसरली. जळगाव जामोद येथील प्रफुल उर्फ पप्पु तुपकरी (वय २६) व मुकेश कंकाळे पाटील (वय ३१) हे दोघे बुधवार २ सप्टेंबर रोजी अकोला येथे दुचाकी क्र.एमएच२८एएच-४३३१ खाजगी कामाकरीता गेले होते. सायंकाळी अकोल्यावरून जळगाव जामोदकडे येत असताना रिधोराजवळील पेट्रोलपंपासमोर त्यांची दुचाकी महामार्गावरील खड्डयात गेल्याने त्यांचे नियंत्रण सुटले. दरम्यान सदर दुचाकीला समोरून येणार्‍या डब्ल्यु.बी.२३ सी-५१४२ क्रमांकाच्या ट्रकने जबर धडक दिली. त्यात मुकेश पाटील हे जागीच ठार झाले. तर पप्पु तुपकरी हे गंभीर जखमी झाल्याने त्यांना अकोला येथे रूग्णालयात भरती करण्यात आले. मात्र उपचारादरम्यान त्यांची प्राणज्योत मालवली. या घटनेने जळगाव नगरावर शोककळा पसरली आहे. पप्पु तुपकरी यांचे तीन महिन्यापुर्वीच लग्न झाले होते. तर मुकेश पाटील यांना एक छोटा मुलगा आहे. सदर अपघात रस्त्यावरील खड्डयांमुळे घडल्याचे सांगण्यात येत आहे.