टिळकांच्या प्रेरणेने स्थापन झाले टिळक राष्ट्रीय विद्यालय

टिळक राष्ट्रीय विद्यालयाच्या स्थापनेनिमित्त विद्यालयात विविध कार्यक्रम.

खामगाव : लोकमान्य बाळ गंगाधर टिळक यांच्या प्रेरणेने सुरू झालेल्या चार प्रमुख विद्यालयांपैकी खामगाव येथील टिळक राष्ट्रीय विद्यालय हे एक महत्त्वपूर्ण विद्यालय आहे. २३ जुलै रोजी लोकमान्य बाळ गंगाधर टिळक यांची जयंती आहे. या निमित्ताने टिळक राष्ट्रीय विद्यालयाच्या स्थापनेनिमित्त विद्यालयात विविध कार्यक्रम आयोजित केले आहेत. भारताच्या स्वातंत्र्यलढय़ात झालेल्या चळवळीचे प्रदीर्घ काळ केंद्र राहिलेले खामगाव येथील टिळक राष्ट्रीय विद्यालय हे शहराचे वैभव तर आहेच शिवाय स्वातंत्र्य चळवळीचे जिवंत स्मारकही आहे. महात्मा गांधीजींनी सुरू केलेल्या आंदोलनामुळे प्रभावित होऊन २४ जानेवारी १९२१ रोजी टिळक राष्ट्रीय विद्यालयाची स्थापना झाली. स्वराज्य, स्वदेशी, राष्ट्रीय शिक्षण व विदेशी वस्तूंवरील बहिष्कार या चतु:सूत्रीनुसार या विद्यालयाचा कारभार चालत होता आणि आज ९0 वर्षानंतरही विद्यालयाचे काम याच तत्त्वानुसार सुरू आहे. परकीय सत्तेच्या जुलमाने पेटून उठलेल्या कार्यकर्त्यांनी गांधीजींवरील असीम श्रद्धेने भारावलेल्या विचारातून या विद्यालयाची स्थापना केली. त्या काळात राष्ट्रीय विद्यालय म्हणजे स्वातंत्र्य चळवळीचे एक केंद्र होते. पुस्तकी ज्ञानाबरोबरच विद्यार्थ्यांना बलशाली व निरोगी जीवन जगण्यासाठी शारीरिक कसरतीचे शिक्षण देणे येथे सुरू झाले. प्रखर राष्ट्रवाद हीच या संस्थेची ओळख झाली आहे.