खामगाव (बुलढाणा) : दुचाकीसह प्रवासी कार, मालवाहू वाहन आणि आणखी एका अशा एकूण चार वाहनांच्या विचित्र अपघातात तीनजण जागीच ठार झाले, तर एकजण गंभीर जखमी झाला. ही घटना देऊळगाव साकरशा पारखेड फाट्यानजीक रात्री ९:३० वाजताच्या दरम्यान घडली. जखमींना खामगाव, छत्रपती संभाजीनगर आणि अकोला येथे हलविण्यात आले.
देऊळगाव साकरशा पारखेड फाटानजीक असलेल्या एका वीटभट्टीवर तीन मजूर दुचाकीने जात होते. त्याचवेळी एका पाठोपाठ एक अशा तीन वाहनांचा विचित्र अपघात झाला. या अपघातात अनियंत्रित झालेल्या एका वाहनाने तिघांना जबर धडक दिली. या धडकेत दुचाकीवरील तिघेही फेकले गेल्याने तिघांचा घटनास्थळीच मृत्यू झाला. लक्ष्मण सीताराम गवळी (वय ४५), इरफान शेख हुसेन (वय ३८), सचिन नहार (वय २८) सर्व राहणार देऊळगाव साकरशा अशी मृतांची नावे आहेत. अपघातातील गंभीर जखमींना सुरुवातीला खामगाव येथील सामान्य रुग्णालयात हलविण्यात आले; मात्र प्रकृती अत्यवस्थ झालेल्या मालवाहू वाहनातील एजाज दिलावर पठाण या गंभीर जखमीला अकोला येथे हलविण्यात आले.
प्रवासी कारमधील काहीजणांना छत्रपती संभाजीनगर येथील रुग्णालयात हलविल्याचे समजते. या घटनेची माहिती मिळताच जानेफळ पोलिस स्टेशनचे पथक घटनास्थळी दाखल झाले; मात्र तत्पूर्वीच रस्त्याने ये-जा करणाऱ्या वाहनचालकांनी मिळेल त्या वाहनाने जखमींना उपचारार्थ रुग्णालयात हलविले. हा अपघात नेमका कशामुळे घडला याबाबत निश्चित कारण समोर आले नसले तरी, अनियंत्रित झालेली एम एच ०४ जीई ८७१२ क्रमांकाची प्रवासी कार दुचाकीवर येऊन आदळली. त्याचवेळी मालवाहू वाहन क्रमांक एमएच २८ ए बी ४३९६ या वाहनालाही प्रवासी कारने धडक दिली. वाहनाचा चालक गंभीर जखमी झाला. या चालकाला सुरुवातीला खामगाव आणि नंतर अकोला येथे हलविण्यात आले. चालकाची प्रकृती गंभीर असल्याचे समजते. या घटनेची माहिती मिळताच रुग्णांच्या मृतांच्या नातेवाइकांनी सामान्य रुग्णालयात धाव घेत एकच आक्रोश केला.