देऊळगाव राजा (बुलढाणा) : शाळेत गेलेल्या मुलाला आणायला रस्त्यावर का गेलीस या कारणावरुन पत्नीसोबत वाद घालत पतीने गळा आवळून खुन केला. ही घटना ३ एप्रिल रोजी देऊळगाव राजा येथे घडली. याप्रकरणात आधी आकस्मिक मृत्यूची नोंद करण्यात आली होती. मात्र, शवविच्छेदन अहवालानंतर आरोपी पतीविरुद्ध ५ एप्रिल रोजी खुनाचा गुन्हा दाखल करण्यात आला आहे.
देऊळगाव राजा शहरातील शिवाजी पार्क भागात राहणारा आरोपी सुनील भास्कर गिते (३५) याने ३ एप्रिल रोजी त्याची पत्नी शिवकन्या सुनील गिते (२५) यांच्यासोबत सकाळी साडेदहा वाजता शाळेतून येणाऱ्या मुलाला आणायला रस्त्यावर का गेली या कारणावरुन वाद घातला. दरम्यान त्याने शिवकन्या गिते यांचा गळा आवळून खुन केला. याप्रकरणात पोलिसांनी आधी आकस्मिक मृत्यूची नोंद करुन मृतदेह उत्तरीय तपासणीसाठी पाठवून तपास सुरु केला होता.
शवविच्छेदन अहवालानंतर फुटले बिंग
याप्रकरणाचा तपास करणारे सहाय्यक पोलिस निरीक्षक दत्तात्रय वाघमारे यांनी घटनास्थळाचा पंचनामा करुन संशयित आरोपी पतीचा जवाब नोंदविला होता.मात्र प्रतीक्षा होती शवविच्छेदन अहवालाची. दरम्यान ५ एप्रिल रोजी शवविच्छेदन अहवाल प्राप्त होताच शिवकन्या गिते यांचा गळा आवळून खुन करण्यात आल्याचे समोर आले. पोलिसांनी पोलिसी खाक्या दाखवताच आरोपी सुनील गिते यांनी खुनाची कबुली दिली.
आज न्यायालयापुढे केले जाणार हजर
आरोपी सुनील गिते यास अटक करण्यात आली असून, त्यास आज न्यायालयापुढे हजर केले जाणार आहे. याप्रकरणाचा पुढील तपास पोलिस निरीक्षक जयवंत सातव यांच्या मार्गदर्शनाखाली सहाय्यक पोलिस निरीक्षक दत्तात्रय वाघमारे करीत आहेत.